TAGBILARAN CITY, Bohol, Dec 20 (PIA) – Dala sa ka-importante sa sugang dagitab karong mga panahon sa Pasko, mingpasalig ang National Grid Corporation of the Philippines (NGCP) nga dili una nila ipahinayon ang gikinahanglang maintenance activities sa ilang linya aron walay bugto ang ilang serbisyo ning panahon sa holidays.
Matud ni NGCP Cebu-Bohol District Manager nga bisan kon angay na unta nga pulihan ang tempraryo nga Optical Ground Wire (OPGW) sa tower number 38 ngadto sa 41.
Ang pamahayag ni Engr Lomaad, iyang gisaysay atul sa side interview dihang mingtambong sila nga taga NGCP sa sinemana nga Capitol Reports.
Gawas sa panginahanglan karon sa dagum dagitab tungod kay Pasko, midugang sa pagpaambit si Engr Lomaad nga lisud usab alang kanila ang pagpatabok sa ilang mga kagamitan tabok sa lungsod sa President Carlos P. Garcia tungod kay baradero pa ang barge nga nagaserbisyo sa Tapal ngadto sa Popoo sa pikas tampi.
Ang NGCP towers no. 38-41 mao ang mga tore nga gilukot lukot sa bagyong Odette niadtong miaging tuig ug maoy hinungdan nga napawong ang supply sa koryente sa tibuok Bohol.
Human sa lima ka buwan nga ngiob sa Bohol, nahibalik ang supply sa koryente diha nga gipabarug sa NGCP ang Emergency Restoration System towers nga temporaryong ipuli sa nangalukat nga tore nga gibagyo.
Pila ka buwan human niadto, gipahiuli sa NGCP ang mag bag-o ug permanente nga mga tore, aron matangtang na kadtong mga temporaryong tore.
Karon, alang sa permanente nga tore, gitagana na ang panahon nga pulihan ang optical ground wire, ug tungod niini, kinahanglang pawngon na usab ang supply gikan sa Leyte, alang sa mas luwas nga pagtrabaho sa linya.
Ang towers no 38-41, anaa mismo mahimutang sa Ubay ug Pres CPG, nga mao usab ang kutay nga nagsupply sa Bohol.
Niini, matud ni Engr Lomaad, ilang huwaton nga mahuman human na usab ang mga pista sa Enero, sa dili pa nila ibalik og himo ang maintenance activities.
Gawas pa, magpaabut pa usab sila nga mahibalik ang serbisyo sa barge. (RAHC/PIA-7/Bohol)
