Gikabaniog di pa dugay ang usa ka video nga gipakatag diin gipanghimakak ni First Lady Liza Araneta Marcos ang taho nga may kalabutan sya sa pagtudlo sa mga opisyales sa Intelligence Services sa Armed Forces of the Philippines (ISAFP).
Sa maong video nga gipakayag mismo sa hepe sa Presidential Security Group (PSG) nga si Col. Demy Zagala, namahayag ang unang ginang sa nasud nga gikapuy na sya sa mga tawo nga gigamit ang iyang ngalan.
Wa hinuon isulti sa kapikas ni Presidente Ferdinand Marcos Jr. kon kinsay iyang gipasabut gawas nga nalakbitan ang pagkatudlo sa mga opisyales sa ISAFP. Nibahad hinuon siya nga ingnon ang Presidente nga di itudlo kadtong mogamit sa iyang ngalan.
Seryoso kini nga butang mao nga husto ang unang ginang nga hatagan kinig pagtagad pinaagi sa video nga gipakig-ambit usab sa kinatas-ang opisyal sa PSG, ang ahensya nga gitahasan pagbantay sa Unang Pamilya ug ubang responsableng mga opisyales.
Apan di igo ang pamahayag sa pagpanghimakak sa unang ginang. Sayon ra ni isulti apan laing istorya na og motuo ba ang katawhan. Sa unang lugar, nganong nigawas man ning maong sugilanon?
Niadtong panahon ni kanhi Presidente Rodrigo Duterte, wa gayud nahimong isyu ang pag-apil-apil sa iyang pamilya sa pagpadagan sa nasud. Bisan ang iyang anak nga napili isip mayor sa dakbayan sa Davao, karon Bise Presidente Sara Duterte, wa gyud bisag naintriga og kas-a sa tibuok unom ka tuig sa iyang paglingkod.
Og duna may mga hungihong nga nanghilabot ang kaipon o kanhi kapikas ni Presidente Duterte, giisip kini sa kadaghanan nga apil sa naandan nga intriga sa pulitika. Wa kini moabut sa punto nga nagkinahanglan og pormal nga pamahayag.
Karon, unom pa lang ka bulan ni Presidente Marcos, nahimong seryoso kining maong isyu hinungdan nga kinahanglang ipagawas ang pamahayag sa unang ginang. Ngano kaha nga nitumaw man ang iyang ngalan? Dis-a ug kanus-a man nahilambigit ang unang ginang?
Kitang mga Bisaya dunay panultihon nga nag-ingon nga kon dunay asu, duna gyuy kayo. Wa ta mosulti nga asu kining maong balitaa apan seryoso kini nga butang nga angay atubangon di lang sa unang ginang apan ni Presidente Marcos mismo. Siya, og di ang iyang asawa, maoy pinili sa katawhan. Siya ang dunay responsibilidad alang niini.
Ang nakalahi ni Presidente Duterte ug ni Presidente Marcos mao nga og dunay problema, ang nauna mismo maoy mosungsong niini. Si Presidente Marcos hilom sa daghang mga isyu nga angay siyay motingog sama niining giatubang sa AFP ug sa kapulisan. Tingali mahilom kining isyu sa pag-apil-apil sa unang ginang apan di angay kumpyansahan. Mogawas gihapon ang tinuod tungod kay way asung makumkom.
