Giklaro sa Department of Education (DepEd) nga miduso unta kini ug gahin nga P532 milyones alang sa Special Education (SPED) alang sa tuig 2023.
Sa usa ka opisyal nga pamahayag, ang DepEd nagpadayag sa kasubo Nga bisan pa sa sinsero niini nga paningkamut alang sa mga tinun-an nga adunay pinasahi nga panginahanglan, wa maapil ang maong gahin alang sa National Expenditure Program (NEP).
Sa maong pamahayag, mao usab kini ang gidangatan sa laing duha pa ka mga programa nga wa giapil sa NEP. Wa nganli sa pamahayag ang maong mga programa.
Ang pamahayag giluwatan sa DepEd aron tul-iron ang mga taho nga malisyoso ug hiwi nga gituyo sa maong ahensya nga di gahinan ug pondo ang SPED.
Gani, nagkanayon ang DepEd nga mao kini nagpanghitabo kada tuig apan wa kini mapasagdi tungod kay naningkamot ang ahensya nga mangita ug paagi aron kahatagan ug pondo ang maong mga programa.
Tungod usab sa tabang sa mga sakop sa Kongreso, gibutyag sa DepEd nga gipaningkamutan niini sud sa mismong ahensya nga kahatagan ug suporta ang nahisgutang programa.
