Dili ikalimod nga daghan ang namatay ug nabiktima sa balaod militar sa kanhi administrasyong Marcos Sr., 50 ka tuig na ang nakalabay kaniadtong Miyerkules, Septiyembre 21.
Suma pa sa datos sa Amnesty International, usa ka global human rights watchdog, anaay kapin 100, 000 ka libo nga biktima ang martial law sa amahan nga Marcos.
Matud pa, 3,000 ang namatay, 34,000 ang gi-tortyor ug 70,000 ang gipangdakop.
Ang mga aktibista maoy nanguna sa pagkondena sa maong pait nga pakli sa kasaysayan sa Pilipinas.
Niapil sa paghandum ang mga biktima ug saksi sa maong kontrobersyal kaayo nga balaod militar.
Ang mga dumadapig sa mga Aquino o giilang mga “Dilawans” o “Pinklawans” sa bag-ong panahon, mga nakasaksi ug wala ilabina ang ubang kabatan-onan, maoy nihandum ug nangusog sa kampanya nga “Never again, Never forget” matud pa.
Pasabot, dili kuno ibalik ang mga Marcos sa Malakanyang ug dili kalimtan ang ‘dautan’ nga nahimo sa maong pamilya panahon sa balaod militar nga giingong maoy nagpadato sa maong pamilya tungod sa alegasyon sa “ill-gotten wealth” nga maingon sa uban nga “tinuod” gayud ilabina binilyon ang nabawi sa gobyerno ug mga bawiinon pa.
Apan unsaon man nga nakabalik man ang mga Marcos tungod sa kapin 31 milyones nga nipili ni kanhi Senador Bongbong Marcos, Jr.?
Unod usab sa ilang mga protesta nga dili nila kalimtan ang nahitabong balaod militar 50 ka tuig na ang nakalabay hangtud dili bayran sa mga Marcos ang ilang sala ug utang sa katawhan ug nasud Pilipinhon.
Kay giingon nga “there is no reconciliation without justice”.
Sa tono sa mga Marcos, wala silay sayop ilabina ang ilang amahan nga si kanhi Presidente Ferdinand Marcos, Sr.
Gani, ang anak nga Marcos nga si Pres. Bongbong Marcos, Jr. nangatarungan ug nihagit nga “Open the case and let us argue” o ang mahitungod sa giingong ‘estate tax’ case sa ilang pamilya ug mga kauban.
Kon anaay sayop, angkunon. Kon wala, pasagdan na lang ang yawyaw sa katawhan ilabina kadtong giingong mga biktima. Pero ana-a gayuy sayop.
Lisod matud pa ang pag-‘move-on’ kon walay magpasaylo ug mangayo og pasaylo.
Ang pangutana, kanunay na lang ba kini sa matag tuig?
Apan sa katapusan, ang Labaw nga Maghuhukom ang mohukom sa tanan, lider ka man o dili.
