PATAY diha-diha dayon ang usa ka drayber human ang gimanehoang motorsiklong Honda XRM 125 gikasungag pagkabangga sa gikasugat niining laing motorsiklo sa may nasudnong dalan, Brgy. Taytay lungsod sa Getafe mga alas-6:45 ang takna gabii sa Lunes.
Giila ang biktima nga usa ka Carlito Torreon y Estoce, 48, minyo, mamumuo ug residente sa P4, Brgy. Poblacion, Getafe.
Gideklara kini nga Dead On Arrival ni Dr. Pamela Marie M. Chua, MHO, sa paghidangat sa Mun. Health Center.
Samtang ang gikasugat nga motorsiklong Kawasaki Bajaj 100 gi-drayban sa usa ka Joel Turtoga y Escartin, 53, minyo ug lumolopyo sa Brgy. Magsaysay, Talibon.
May backrider kini nga asawa nga nailhang Artemia Turtoga y Duterte, 48.
Ang duha parehong nanga-angol, daling gidala ngadto sa Garcia Memorial Prov’l Hosp. sa Talibon.
Ang pasiunang imbestigasyon nagbutyag nga ang magtiayon gikan sa silingang lungsod Buenavista padulong pauli ngadto sa Talibon.
Samtang ang patayng biktima nga gituhoang ubos sa makahubog nga ilimnon gikan sa Talibon paingon na sa pinuy-anan niini sa Poblacion, Getafe.
Sumala sa Police Report nga kusog ang dagan niini ug nagzigzag ang agi ug pag-abot sa dapit nahitaboan misungag sa gika-engkwentrong sakyanan, hinungdan sa hinanaling kamatayon sa biktima. ###REYLAO/Wenny Reyes/AND
