NAANGOL ang usa ka barangay kapitan human aksidenteng nabanggaan ang motorsiklo nga gimanehoan niini sa laing motorsiklo sa nasudnong dalan didto sa Barangay Tinago, lungsod sa Dauis mga alas 8:40 sa gabii niadtong Dominggo.
Ang biktima giila nga si Rosario Acedo Pinatubo, 47 anyos, minyo, lumad nga lumolupyo sa Purok 5 sa maong dapit.
Sigun sa imbestigasyon sa Dauis Police Station nga samtang ang biktima luwan sa iyang Yamaha Mio nga motorsiklo paingon na untang moliko padung sa Barangay hall sa maong dapit. Dihang pag-abot duol sa covered court, ni-u-turn kini apan aksidenteng nabanggaan sa nagsunod niining Honda XRM 125 nga motorsiklo nga gimanehoan ni Jeremy Guivencan, 24, lumad sa Brgy. Looc, Panglao.
“Ni-u-turn ni si kapitan abi niya og na clear na, ” butyag ni PCPL Ariel Luayon sa Dauis PNP.
Nahiagom ang biktima og mga pangos ug angol sa kalawasan niini lakip si Guivencan. Ug pulos gihatud didto sa Gov. Celestino Gallares Memorial Hospital sa siyudad sa Tagbilaran. ( ALAN ANDY NALZARO DALAGAN )
