DUHA ka mga batan-ong lalaki kinsa giingong notoryus nga mga kawatan ug gitumbok nga suspek sa sunod-sunod nga pagpanglungkab sa U-box sa mga motorsiklo, nadakpan sa kapolisan didto sa Purok 3, Brgy. Poblacion, lungsod sa Cortes mga ala-una sa sayong kabuntagon kagahapon.
Ang mga suspetsado giila nga sila Joseph Ibañez y Tedio, 20 anyos, ulitawo, construction worker, lumad nga lumolupyo sa Brgy. Poblacion, Catigbian, Bohol, kasamtangang nagpuyo sa Brgy. Cogon, siyudad sa Tagbilaran ug John Velasquez y Paredes, 19, ulitawo, construction worker, residente sa Erico B. Aumentado Street korner Calceta St., Dakbayan sa Tagbilaran.
Ang ginsakpan sa Cortes Municipal Police Station, nisikop sa maong mga suspek human nasakpan sa akto sa pagpangawat ug ilang gibiktima usab ang usa ka polis nga nailhan nga si PSSg. Paterno Arbitratrario nga sakop sa kapolisan sa maong lungsod.
Nakuha sa ilang posisyon ang usa ka OPPO A15 cellphone, kolor itom nga pitaka nga may sulod salapi nga di mominus P200, PNP ID ug Drivers license card nga gisulod sa u-box sa ilang motorsiklo, usa ka Realme cellphone kolor itom ug usa ka itom nga motorsiklo nga Euro 175 nga ilang gigamit.
Human sa sunod-sunod nga interbiyio sa Cortes PNP, sila miangkon ug mitug-an nga sila involve sa nahitabong pagpangawat sa Disco Fiesta Celebration sa Basketball Court sa Barangay Rosario, Cortes ug ilang boluntaryong gi-surrender ang mga mosunod nga mga butang:
Sa posisyon ni Ibañez usa ka Real Me Cellphone kolor light blue ug duha ka Vivo cellphone kolor blue.
Samtang gikan kang Velasquez mao ang duha ka Vivo cellphone kolor pula ug blue/itom kombinasyon, duha ka Oppo cellphone kolor itom ug gold, usa ka MI cellphone kolor silver, ug usa ka Huawei cellphone kolor itom.
SI PSSg Jonathan Omayan sa Cortes PNP nga nahinabi sa BBDN ug Bee Sunrise News, nibutyag nga human nasikop ang duha ug gi-post sa ilang Facebook account ang mga narekober nga cellphone, laíng unom nga nagpaila nga nabiktima niini ang nidangop sa ilang buhatan. Ug gi-claim ang mga gadget niini.
“Daghang nanawag nga taga lungsod sa Garcia Hernandez, Batuan ug Carmen. Wa ta kabalo nga ang mga suspek naabot nianang mga lugara, ” butyag ni Omayan.
Gibilanggo na sud sa selda sa Cortes PNP ang maong mga dinakpan. Samtang giandam ang tukmang sumbong nga ipasaka batok kanila.
sa piskaliya. ( ALAN ANDY NALZARO DALAGAN )
