HUMAN gitutokan ni Gobernador Aris C. Aumentado ang kampanya batok sa ilegal nga druga, 570 na ka mga barangay sa tibuok lalawigan sa Bohol ang gideklarang drug cleared sa Philippine Drug Enforcement Agency kun PDEA-Bohol.
Druga lima ka letra apan daghan na sa mga kaugmaon ug mga pangandoy ang giguba labina gayod ang usa ka pamilya. Tungod niini, hugot nga kampanya batok sa ilegal nga druga ang gihimo ni Gob. Aumentado sa lalawigang Bol-anon sa panglantaw nga dili malambigit ang mga batan-on niining butanga.
Sa maong adbokasiya ang Philippine Drug Enforcement Agency kun PDEA nga nakabase sa Bohol, naghimo og sunod-sunod nga operasyon ilabina ang buy-bust operation diin sa buwan sa Agosto ug Hulyo mokabat na sa milyon ang mga nasakmit sa gituohang shabu.
Atol sa Capitol Report niadtong Bernes, gibutyag ni Michael Vargas sa PDEA-BOHOL Bohol nga 570 na ka mga barangay ang drug cleared. Usa ka timaan nga natuman ang mando sa gobernador diin sa datus usab sa Bohol PNP miubos sa 34 porsiyento ang criminality rate sa tibuok lalawigan.
Sa pagka-karon, padayon ang matag operasyon alang sa kahapsay ug kalinaw aron makab-ot sa administrasyon ang giingong makapasigarbo Bohol. ( AND )
