GIPANGHINAOT ni Second District Congresswoman Vanessa Aumentado nga makakuha og saktong pondo ang Department of Social Welfare and Development kun DSWD alang sa pagpatuman sa mga programa ilabina alang ngadto sa mga kabos.
Sa iyang mensahe atol sa graduation sa mga beneficiary sa Pantawid Pamilya Pilipino Program 4P’s niadtong Bernes, mipadayag kini sa iyang suporta sa DSWD ilabina sa paggahin og pondo diin siya isip magbabalaud dako usab ang matabang ilabina karon sa nagpadayon nga budget hearing sa kongreso.
Buot sa babayeng kongresista nga makakuha og saktong pondo ang DSWD aron daghan usab ang matabangan nga katawhan nga nanginahanglan ilabina dinhi sa lalawigan sa Bohol.
Samtang nanghinaut usab ang magbabalaud nga magpadayon ang pagpalambo sa panginabuhi sa tanang bag-ong migradwar sa 4Ps nga mga Bol-anon.
Ang mga migradwar sa 4Ps kasagaran nakalampos na ilang anak sa pagpatungha nga mahimo na usab nga kaabag ilabina sa pinansiyal nga panginahanglanon. ( AND )
