Hingpit na nga balaud ang ‘SIM Card Registration Act’ o Akta Republika 11934 nga gipirmahan ni Presidente Bongbong Marcos Jr. kaniadtong Lunes, ang pinakaunang balaud nga iyang gilagdaan isip Pangulo sa Pilipinas.
Ang tumong sa maong balaud nga mapakgang ang mga text scams ug spams o ubang mga krimen gamit ang sim card.
Ang mga importanteng hinumduman sa RA 11934 mao ang mga mosunod:
✓Sa dili pa mobaligya sa mga SIM cards, ang mga telco companies ug direct sellers gikinahanglan nga mangayo og ‘valid identification document’ ngadto sa mopalit o mogamit og niini.
✓Ang pagrehistro sa usa ka SIM card gamit ang dili tinuod nga impormasyon, migamit og dili tinuod nga ngan, o naghimo og pagpangilad nga mga aktibidades, pahamtangan og tukmang penalidad.
✓Kon anaay subpoena o court order, ang mga telcos kinahanglan mohatag sa mga ngalan ug pinuy-anan sa mga tag-iya sa SIM card.
✓Ang mga tawo nga ana-a na’y SIM cards kinahanglan mopa-rehistro sa telcos sa gihatag nga panahon (sulod sa 180 diyas human mahimong epektibo ang maong balaod). Kon dili ipa-rehistro, otomatik nga ma-‘deactivate’ ang mga SIM cards ug dili na magamit.
✓Ang subscriber SIM cards kinahanglan ibutang sa file sa mga telecommunications companies. Ang listahan sa mga authorized dealers ug mga ahente sa tibuok nasud kinahanglan ipasa quarterly sa mga kompanya ngadto sa National Telecommunications Commission (NTC).
✓Ang mga telcos hangyuon sa mga law enforcement agencies nga motan-aw sa tag-iya sa SIM card kon sila mohimo og imbestigasyon kon anaay mga krimen nga nahitabo gamit ang phones (o cellphones).
Suma ni Office of the Press Secretary officer-in-charge Cheloy Garafil, ang SIM Card Registration Act tinguha nga makahatag og “accountability in the use of SIM cards and aid law enforcers to track perpetrators of crimes committed through phones.”
Ang paglagda usab sa maong lakang gilauman nga mo-“significantly boost government initiatives against scams committed through text and online messages, which have become more prevalent this year.”
Daghang nalipay sa pagkabalaod niini ilabina naghitak ang mga pagpangilad gamit ang texts sama sa nakadaug ang usa ka cellphone number, anaay gipangtanyag nga mga trabaho, premyo sa duwa ug uban pa.
Sa laing bahin, anaay niingon nga basin kini kalapasan sa nauna ng ‘Data Privacy Act’.
Sa ubang nasud, rehistrado ang ilang mga SIM cards.
