Siyam (9) ka tuig na ang nakalabay karong adlawa (Oktubre 15) human gitay-og ang lalawigan sa Bohol sa 7.2 magnitude nga linog, nga maoy giingong pinakakusog sa kasaysayan sa Bohol.
Nahugno ang pipila sa mga karaang Simbahang Katoliko. Daghang mga edipisyo ug mga balay ang nangagupok ug may mga kinabuhi nga nakalas.
Saksi ang tibuok nasud ug kalibutan sa pagkatumba sa ekonomiya sa probinsya sa Bohol.
Daghang mga pangagpas nga basin kabubut-on sa Kahitas-an ang maong panghitabo — kay nahisalaag na matud pa ang katawhan gikan sa ispiritwal nga pagtuo.
Sa Siyensiya o Science, mao ang pagtuo nga kini usa lamang ka ‘natural’ nga kalamidad o paglihok sa ilawom sa yuta gumikan sa puwersa niini.
Sa maong kulba kaayong panghitabo, nagtapun-og ang mga hinabang gikan sa nasudnong bulsa, sa gawas sa nasud ug mga pribadong organisasyon o pundok.
Ang makalusno lang nga kamatuoran kay ana-a pa gihapon ang isyu nga ang ubang mga hinabang “nasayang” lang kay gi-pamolitika sa ubang mga pulitiko. Gibulsa. Kamatuoran nga tataw kaayo sa mata sa katawhan. Konsensya na lang ang mogukod nila.
Daghang mga pasalig sama sa “Pabahay Program” sa gobyerno ngadto sa mga nawad-an og pinuy-anan.
Ang nakapait lang kay hangtud karon sa hapit usa (1) na ka dekada ang nakalabay, ana-a pa gihapo’y mga pamilya nga wala nakapahimulos sa maong programa.
Daghang bagulbol ilabina sa mga kabus nga nabiktima sa maong katalagman: hain na ang gisaad nga mga hinabang ug ang Pabahay Program?
Bag-o lang usab naablihan ang mga karaang simbahan. Ug maayo lang gani kay dili na istrikto ang health protocols sa Bohol tungod sa pandemya sa COVID-19 nga hapit na mahingpit ang pagkahanaw.
Ang labing importanteng pangutana: sa maong linog nga nihapak kanato, nakabangon o naka-‘move on’ na ba ang mga Bol-anon? Kumusta, Sano ug Sana?
Manghinaot kita nga anaay nakat-unan ang matag usa kon unsa may atong mga kasaypanan ug mas palig-unon pa ang atong pagsalig sa Labaw’ng Makagaghahum.
