TAGBILARAN CITY, Bohol, October 25 (PIA)–Nangandam na ang Bohol Police Provincial Office (BPPO) sa ilang mga lakang sa seguridad alang karong tuiga sa pag-obserbar sa All Saints/Souls’ Day o “Kalag-Kalag’.
Matud pa ni BPPO Director Col. Osmundo Salibo, mokabat sa 832 ka mga pulis ang ipakatap sa tibuok lalawigan sa Bohol.
Si Salibo miingon nga gawas sa mga sementeryo, ang kapolisan mo-secure usab sa ubang mga dapit nga tapokanan sama sa mga simbahan, malls ug mga terminal sa pampublikong transportasyon aron ipakita ug mabati sa publiko ang maximum police visibility.
“Other government agencies will also be doing their part. They will be helping us (Ang ubang mga ahensya sa gobyerno mobuhat usab sa ilang bahin. Sila motabang kanato),” matud pa ni Salibo sa usa ka press conference.
May dugang nga 352 ka personnel usab gikan sa 47th Infantry Battalion sa Armed Forces of the Philippines (AFP) nga mahimong kaabag sa PNP.
Samtang mokabat sa 1,757 ka force multipliers nga naglakip sa mga volunteer- tanod, Lingkod Bayan Advocacy Support Groups, Patrolya ng Bayan, Alpha Kappa Rho ug Tau Gamma Phi/Sigma ang motabang sa pagmintinar sa seguridad sa katawhan.
Gibutyag usab ni Salibo nga magbutang og police assistance desk sa entrada sa matag sementeryo sa tibuok lalawigan. (ecb/PIA7-Bohol)
