HINGKABSAN sa iyang kinabuhi ang usa ka Swedish national kinsa aksidenteng na-kras ang motorsiklo nga gimanehoan niíni ug naguyod kay giingong hubog sa nasudnong dalan didto sa Purok 5, Barangay Danao, lungsod sa Panglao mga alas 4:00 sa sayong kabuntagon niadtong Huwebes.
Ang biktima giila nga si Nader Roozbahane, 58 anyos, temporaryong nagpuyo sa maong dapit.
Sayo niini, samtang ang biktima luwan sa usa ka Honda Beat nga motorsiklo kolor puti nga íyang giabangan. Nagdagan gikan sa Alona padung na untang mouli sa Brgy. Danao dihang pag-abot sa lugar nga nahitaboan, aksidenteng nawad-an og kontrol gumikan kay gikatahong lango sa bino. Pagkatumba sa motorsiklo, wala niya buhii ang manobela hinungdan nga naguyod og pipila ka metros ang biktima.
“Hubog ni siya, gikan sa Alona, ” butyag ni Patrolman James Leo Milloria sa Panglao Municipal Police Station nga nahinabi sa BBDN ug Bee Sunrise News.
Nakaangkon og grabeng angol sa ulo ang nasampit nga biktima ug giingong nawad-an sa panimuot gumikan kay dunay crack o liki sa ulo.
“Posibleng wa maghelmet ning biktima kay way narekober sa dapit nga nahitaboan,” dugang ni Milloria.
Daling gihatud ang maong biktima didto sa Gov. Celestino Gallares Memorial Hospital sa siyudad sa Tagbilaran. Ug gikatahong anaa sa intensive care unit kun ICU. Apan pagka alas 8:45 sa gabii nianang adlawa nabugtoan sa iyang kinabuhi ang maong biktima.
( ALAN ANDY NALZARO DALAGAN )
