GITINGUHA ni Gobernador Aris C Aumentado nga makapahigayon og dinagkong kalihokan ang lalawigan sa Bohol dungan sa pagpalambo sa industriya sa turismo ug pag-anhi sa mga mamumuhunan.
Kini human usab sa tabang ni Senador Imee Marcos nga matukod ang Bohol Convention Center pinaagi sa paghatag og inisyal nga pondo nga mokabat sa ngadto sa P50 milyones.
Si Aumentado miingon nga niadto lang milabay nga semana sa dihang nagkita sila ni Senador Marcos ug naapil ang maong kantidad sa pagpalusot sa General Appropriation Act alang sa sunod tuig.
Target ni Aumentado nga makahimo dinhi og mga meetings, incentives, conference and exhibitions kabahin sa turismo.
Sa pagkakaron, wa pay dagkong venue ang Bohol aron himoon ang samang dagkong kalihokan nga maka- promotar sa ekonomiya sa turismo sa probinsya.
Gibutyag usab sa gobernador nga ang Bohol Convention Center gibanabanaang gastohan og 200 milyones pesos usa na ka Multi-Purpose Building nga usa ka polidong pagtukod aron magamit usab kini panahon sa mga kalamidad. ( AND )
