SAN MIGUEL, Bohol — Ang sunog dili matag-an kon asang lugara ug unsang orasa, andam kining modanyos sa mga kabalayan ug edipisyo ilabina ang mga kinabuhi kon dili mapugngan.
Sa pipila ka dekada, ang lungsod sa San Miguel nakabaton na og bag-ong fire station ug fire truck nga nagkantidad og P7.4 milyones.
Gi-turnover kini kaniadtong Diyembre 13 niining buwana, matud ni San Miguel Mayor Ian Gil Mendez.
Ang pagturn-over sa maong fire station gikalipay og dako ni Mayor Mendez.
Kaniadtong 2020, nabanhaw og balik ang maong plano sa dihang ni-courtesy call ang Provincial Fire Marshall Chief Inspector kaniadtong panahona nga si Raul Bustaliño.
Ang mayor kaniadto nga karon mao si Department of Agrarian Reform (DAR) Asst. Secretary Atty. Dodong Mendez ug Vice-Mayor nga si Faustino Bulaga, kauban ang Sangguniang Bayan (SB), nagkahiusa sa katuyoan nga makabaton og kaugalingong fire truck ug fire station.
“Malipay kami og dako niini nga nabanhaw kini (ang pagpabarog og kaugalingong fire building),” suma pa ni Vice-mayor Faustino Bulaga sa maong tuig.
Ang gitukuran sa maong fire station gi-donar sa SB ngadto sa Bureau of Fire Protection (BFP) nga 350 metro-kuwadrados nga yuta kaniadto pa’ng 2016.
Ang pagkatukod sa maong fire station kabahin sa BFP modernization program nga apil sa gihatagan og gibug-aton sa kanhi administrasyong Duterte sa iyang SONA kaniadtong 2020.
Si Mayor Mendez kauban ang LGU-San Miguel nagpasalamat sa mga nitambong sa maong inagurasyon ngadto nila ni Usec Serafin P. Baretto Jr. ug Usec Atty. Lord A. Villanueva, Undersecretaries for Public Safety and Operations – DILG.
“Salamat kaayo Usec Baretto and Usec Villanueva sa inyong kanunayng pagtabang sa among gamay’ng lungsod sa San Miguel, ug personally pagtambong sa atong pag-inaugurate sa bag-ong fire station,” matud sa batan-ong mayor.
Nitambong usab sila si Supt. Josephus Jelianggao (Provincial Jail Administrator & Concurrent District Jail Warden of Bohol District Jail), kanhi Usec Art Evangelista (Executive Assistant to the Governor on Peace and Order & Public Safety and Security), PD Jerome Gonzales (Provincial Director, DILG), Supt. Ma. Phoebe G. Delis (Regional Chief of Staff, BFP-R7), Supt. Noel Nelson B. Ababon ( Provincial Fire Marshal, BFP), Lt. Col. Norman Nuez sa Provincial Operations Management Unit ug Mr. Jun Flores (Executive Assistant to the Governor).
Gipasalamatan usab niya si kanhi Mayor Atty. Dodong Mendez.
“To my father (and ours), Atty Virgilio “Dodong” Mendez for your great courage and effort to make this dream happen for San Miguel,” matud sa FB post niini.
Apil sa iyang gipasalamatan ang mga Department Heads, Barangay Captains ug mga empleyado sa LGU sa pagka-aktibo sa pagtabang sa tanan.
