USA ka kan-anan nga hinimo sa mga light materials kun kahoy ang nasunog gumikan sa napasagdan nga niluto nga nahimotang sa commercial area duol sa national highway sa Barangay Moto Norte, lungsod sa Loon lapas sa tungang gabii kagahapon, Enero 20.
Ang nasunog mao ang Donder’s Eatery nga gipanag-iyahan ni Hospicio Camelotes, 60 anyos, minyo, molupyo sa maong dapit.
Sigun ni SFO2 Gregorio Langcamon, deputy chief sa sa Loon Fire Station, nga ang insidente nahitabo mga alas 12:38 sa sayong kabuntagon samtang ang helper sa maong kan-anan nga si Dante Maratas, naglapwa og tinae sa baka sud sa kawa. Dihang nakatulog kini hinungdan nga nahubsan og tubig ug niinit og maayo nga maoy nakaingon sa kalayo.
“Ang kalan sa sobra kainit, unya wala nay tubig, nikayo siya unya ang duol puro light materials ra,” butyag ni Langcamon.
Matud ni Langcamon nga nidako na ang kalayo dihang nakamata si Maratas. Ug wala niya magamit ang fire extinguisher kay naapil usab sa pagkasunog hinungdan nga daling nidagan ang nasampit helper ug nagpatabang sa mga silingan nga manawag og bombero.
Ningresponde gilayon ang ginsakpan sa Loon Fire Station nga nahimotang mga 350 metros ang gilay-on ug ilang nakontrolar ang kalayo mga alas 12:58.
Gideklarar nga fire out mga alas 1:20 sa buntag.
Nibutyag si Langcamon nga wa na katabok ang kalayo sa kasikbit nga mga establisamento gumikan kay adunay fire wall.
Dugang niya way nangaangol atol sa maong insidente.
Gibanabanaang mokabat ngadto sa P121,500 ang danyos sa maong hitabo. ( ALAN ANDY NALZARO DALAGAN )
