Congw. Aumentado midasig
sa mga 267 graduado sa 4Ps
Mikabat sa 267 ka recipient gikan sa 25 ka lungsod sa lalawigan ang nigradwar sa Pantawid Pamilyang Pilipino Program o 4Ps sa Department of Social Welfare and Development (DSWD).
Mitambong ang tulo ka congresista gikan sa mga distrito sa kongreso sa Bohol atol sa nasangpit nga programa uban sa mga mayor sa nagkalain-laing lungsod ug nihatag sa ilang espesyal nga mensahe ngadto sa mga ning gradwar.
Atol sa maong kalihokan, mipakita og kalipay si 2nd District Congresswoman Vanessa Aumentado, nga mirepresentar sa iyang bana nga si Gobernador Erico Aristotle Aumentado, sa malampusong pagpatuman sa 4Ps aron sa pagtabang sa mga Bol-anon.
Nanghinaut ni Cong. Aumentado nga mao na kini ang kataposang higayon nga ang 267 ka mga gradwado mapaubos sa 4PS program, nga nagdasig kanila sa pagtrabaho og maayo aron makamugna og maayong palibot alang sa ilang mga pamilya nga labaw sa poverty line.
“Kamo ang testimonya, sinyales, ug simbolo nga maong programa nga gihimo sa DSWD (4Ps) kay malamposon. I hope nga maka graduate mo, tuloy na. Meaning, kung unsay estado ninyo kaniadto, dili na unta ta mahibalik. Ning angat ta gamay. unta paingon ta sa kauswagan”, Cong. Aumentado.
Apil sa mga mitambong sa kalihokan ang DSWD Undersecretary nga si Jerico Francis Javier nga mihatag ug keynote speech ug pagpasalamat sa mga ahensya, lungsod, ug ubang sektor sa pagtabang sa pagpalampos sa 4Ps program sa Probinsya.
“Nagpapasalamat ko kay nakita nato ang gamay nga kaibahan ngano tungod kay nakat-on na sila sa ilang kaugalingong paa simula sa pagpasok nila sa programa niini”, matud ni Usec Javier.
Sa pagsusi sa DSWD-Region 7 sugod sa Hulyo 2022, na de-list ang 267 ka panimalay gikan sa Listahan o ang national household targeting system sa mga indigent beneficiaries.
Matud pa sa datus sa maong ahensya, 230 ka babae (86.1%) samtang 37 ka lalaki (13.8%) ang naglangkob sa 267 nga mi-gradwar. Mikabat sa 335 ka bata nga gimonitor gikan sa 267 ka panimalay diin 60.6% niini anaa sa Senior High ug 30.45% gikan sa Junior High. Mihatag ang DSWD ug kinatibuk-ang 45,803,200 milyones ka pesos sa 267 ka panimalay sukad niadtong 2011. (PIMO/rvo/gavincubillo)
HULAGWAY – Si Congresswoman Vanvan Aumentado atol sa graduation sa 267 beneficiaries 4Ps gikan sa kalungsuran. (Cntributed)
