Makompara ang kampanya batok sa ilegal nga drugas sa kanhi administrasyon ug sa kasamtangang administrasyong Marcos Jr.
Kon kaniadto gipakadak-an ni kanhi Presidente Rodrigo Duterte ang pagpapha sa ilegal nga drugas lakip ang korapsyon, sa liderato ni Pres. Bongbong Marcos Jr. karon, layo ang kalahian.
Hinuon masabot nga lahi-lahi gayud og mga prayoridad ang matag Presidente nga molingkod sa Malakanyang.
Ang nakapadaug lagmit ni Digong mao ang iyang saad nga “Change is coming” diha sa pagsilhig sa mga nagpaluyo sa ilegal nga tambal.
Karon, mas nakatutok ang administrasyon ni PBBM sa pagpabangon sa ekonomiya sa Pilipinas ilabina ang isyu sa pagkaon ug sa inflation.
Kon ang tingog sa katawhan ang paminawon, yano apan epektibo ang ilang gusto: i-‘dispose’ dayon ang mga nasakmit ug masakmit nga klarong ilegal nga drugas.
Kon gustohon sa gobyerno, panub-on ang proseso. Siguruhon nga maapil gihapon isip ebidensya sa kaso ngadto sa korte ang mga nakuhang drugas.
Dili mawala ang duda sa katawhan nga ibaligya o paulian ra gihapon kuno sa mga sindikato ang nakuhang mga guinadiling tambal: i-‘recycle’ ra.
Kon dili malabwan ni PBBM ang nahimo ni PRRD batok sa ilegal nga drugas, kinsa pa nga presidente-ha ang makasulbad sa maong karaan nga suliran? Magpaabot na lang ba kita og laing unom ka tuig o sobra pa?
Paminawon unta sa gobyerno ang gusto sa katawhan. Nianang paagiha, mas daling mobalik ang pagsalig sa katawhan ngadto sa mga opisyales sa gobyerno.
