Sa pagreyalisar sa panaad nga pa-‘abante’-hon ang Bohol ilawom sa administrasyong Aris-Victor, nagkinahanglan kini og dayag nga mga lakang.
Gisugdan sa maong tandem ang pagpapas sa korapsyon sa Kapitolyo pinaagi sa OGAR nga kasamtangang naglihok na sa ilang halangdong tahas.
Kon walay mga kahiwian ug korapsyon sa gobyerno, buhong ang katawhang Bol-anon ug ang lalawigan sa Bohol — buhong sa mga grasya diha sa mga programa ug proyekto.
Sa ika-126 nga kasaulogan sa adlaw’ng natawhan ni kanhi Presidente Carlos Polestico Garcia (CPG) kaniadtong Biyernes, kinsa giila isip ‘pinaka-inilang anak sa Bohol’, gilusad ang ‘Job Fair’ isip tabang aron mahatagan og trabaho o maka-trabaho ang mga nagkinahanglan og trabaho aron mabuhi ang ilang mga pamilya.
Ana-a ang daghang opportunidad nga nagpaabot kay daghang mga dagko ug iladong mga kompanya ang moapil sa maong Job Fair.
Sa maong Job Fair, 16 ka mga kompanyang lokal ang mosalmot ug anaay 13 ka mga overseas companies o kompanyang tua sa gawas sa nasud ang motabang sa mga Bol-anon nga nangita og trabaho.
Sa maong Job Fair usab, niabag ang DTI, OWWA, POEA, TESDA, DOLE ug PESO.
Gilauman nga kapin 1,000 ka trabaho ang nagpaabot sa sulod ug gawas sa nasud tungod sa maong Job Fair.
Dako kaayo kining tabang sa katawhang Bol-anon ilabina nangandoy nga makabangon na gayud sa tunhay, nga mao usab ang pangandoy sa lideratong Aumentado-Balite.
Kon mahimo ni Gob. Aris, mas maayo nga himuon kini nga tinuig nga programa aron mas daghan pa ang matabangan.
