Daghan na og dakong kausaban sa Bohol karon. Ug usa niana ang kahapsay ug kalinaw. |
Sa pagtungtong sa bag-ong administrasyon, niubos ang krimenalidad nga natala sa probinsya.
Ngano kaha?
Lagmit, kay maayo ang liderato sa nagdala, nga mao si Gob. Aris Aumentado, Bise-Gobernador Victor Balite ug mga kauban sa buhat nga nagtinarong sa ilang pag-alagad sa katawhang Bol-anon.
Kaniadtong Biyernes sa udto, usa sa dakong opisyal sa Bohol Party Committee sa CPP-NPA ang nitahan sa iyang kaugalingon ngadto ni Gob. Aris atubangan sa kapulisan.
Sa listahan, #1 ‘most wanted person’ sa Bohol sa provincial level tungod sa daghang kasong kriminal.
Maayo kining balita kay usa na kini sa gipangandoy sa katawhang Bol-anon nga makabaton og malungtarong kahapsay ug kalinaw sa lalawigan. Ana-a gihapon ang programa sa gobyerno sa mga nirebelde nga hatagan sila og bag-ong kinabuhi nga luwas sa kakuyaw o peligro, hatagan og panginabuhian ug ubang pribelihiyo kon mo-surrender lakip ang ilang mga armas ug mosaad nga dili na mag-apil-apil sa dautang kalihukan.
Aron dayag ang pag-abante sa Bohol, gikinahanglan nga maangkon niini ang tumang kahapsay ug kalinaw aron mokusog ang ekonomiya sa Bohol diha sa pagdagsa sa mga turista ug mga magpapatigayon.
Padayong nag-awhag ang gobyerno dinhi sa Bohol nga unta mag-anam-anam na og balik sa ilang sabakan ang mga nihawa niini tungod sa gibarugang prinsipyo, apan nihimo og mga kagubot sa probinsya ug sa katawhan.
Gusto sa gobyerno nga itahan na ninyo ang inyong mga kaugalingon ilabina ang mga tinuod Bol-anon. Nianang paagiha, mahibalik ang giilang paraiso nga mao ang Bohol, ug kini magsugod sa kahapsay ug kalinaw nga maoy sinugdanan sa tinud-anay nga kalambuan ug kauswagan.
