Kanhi Mayor John Geesnell “Baba” Yap batok kang Kongresista Edgar Chatto. Kini maoy gikahinaman nga panagsangka sa duha ka mga bantugang pulitiko sa Bohol nga parehong wa makatilaw og pildi.
Sukad sa una niyang paglusad sa pulitika niadtong 1988 dihang midagan siyag mayor sa lungsod sa Balilihan, wa pay mansa ang record ni Chatto. Nahimo siyang bise-gobernador, kongresista sa unang distrito, gobernador ug karon balik pagka kongresista.
Sa pikas bahin, di pud mabintahaan si kanhi Mayor Yap. Sa una niyang pagdagan pagkakonsehal niadtong tuig 2010, nigawas dayon siya nga numero uno sa napulo ka pili-onon sa dakbayan sa Tagbilaran. Nidagan siya pagka-mayor sa sunod piniliay niadtong 2013 ug migawas nga mananaug batok sa duha ka mga lig-ong kaatbang.
Pagtapos sa iyang termino karong tuiga, mipalabay siya aron tutokan ang kandidatura sa iyang kapikas, karong Mayor Jane Censoria Cajes-Yap. Apan samtang nagsilbi siya isip chief-of-staff sa mayor sa Tagbilaran, namatikdan nga kanunay na ang iyang pagduaw sa nagkalain-laing mga kalungsuran sa unang distrito.
Wa kini matago sa mga mata sa mga tigpaniid ug kini naghatud sa pagduda nga ang iyang mata gipuntirya sa lingkuranan nga gihuptan karon ni Chatto. Kung sayop kini nga panag-an, way problema. Apan pilay pad og matinuod?
Samtang usa ka posibilidad alang kang Yap ang paglansad isip bokal, di ikalimod nga gamay ra kaayo kining maong katungdanan alang sa kanhi mayor sa nag-inusarang dakbayan sa lalawigan ug mao usay kinabag-an og botante.
Si Yap aktibo na kaayong nagsuroy-suroy sa unang distrito, tingali hinungdan kon nganong aktibo na usab nga naglibot si Chatto. Kon sila gyud ang magtigi, mao na tingali ni ang pinakakulba-hinam nga panagsangka sa unang distrito. Sumala pa sa mga tang-an nga tigpaniid, karon gyud masukod ang kalig-on ni Chatto.
Dunay mga nagduda nga posibleng dunay usa niining duha ang mosibog. Bisag asa kanila, dunay igong kusog nga moatbang kang Gob. Aris Aumentado, labina si Chatto nga nagsilbi na sa tibuok lalawigan sud sa tulo ka termino. Di sab estranghero si Yap niini tungod kay ang iyang ugangan, Mayor Roberto “Ondoy” Cajes nahimo mang kongresista sa ikaduhang distrito sud usab sa tulo ka termino.
Apan sa klaro nga pagkasulti, layo pa kaayo ang 2025 og daghan pang mahitabo nga posible makautro sa linyada sa pulitika. Unya na gyud na makasulti kon madayon ba ni o di kon molapas na ang petsa nga gitagana sa balaod aron sa pinal nga paghulip sa kandidatura. Sa ato pa, hapinan na lang nato ni daan sa pag-ingon: layo pa ni sa tinuod.
Ang pangutana: posible ba sila magkuyog sa 2025? Kamoy tubag ana.
