Ang mga Bol-anon giila nga buotan, maabi-abihon, matinud-anon ug anaay kahadlok sa Ginoo.
Apan lage sa usa ka bulig kuno, anaay gayuy mosibag, suma pa’s katigulangan.
Panahon sa kalisdanan ilabina panahon sa linog, pandemya ug bagyo nga nakasukod sa atong pagka-Bol-anon ilabina sa pagkaon, hinabang nga pinansyal ug panginabuhian, daghan ang nahimong mapahimuslanon.
Karon nga unanay ng nakabarog ang ekonomiya sa Bohol ilabina sa turismo, daghang mga turista gikan sa silingan mga probinsya, kaulohan ug gawas sa nasud nga naibog sa kaanyag sa Bohol, anaay nigawas nga seryosong isyu.
Si Senior Board Member Tita Baja nihangyo sa Bohol tourist operators ilabina sa mga tourist van drivers nga dili mamiktima og mga langyaw nga bisita pinaagi sa pagpangayo og sobrang plete kada pasaherong turista.
Ang batan-ong magbabalaod giingong nakadawat og taho nga anaay “overcharging” sa pangayo sa pletehan nga P500 matag usa.
Niingon si Baja nga dili kini angay buhaton kay dili lang kini maghatag og negatibong pamati alang sa mga turista apan magbutang og dautang imahe sa lalawigan sa Bohol.
“Bahala’g gamay, basta kanunay,” matud ni Baja sa pagpadagan sa maong negosyo o panginabuhian.
Ana-a ra ba’y giingon sa mga karaan nga dili maayo nga mamintaha kay bisan doro nga paningkamot, mao ra gihapon ang barug sa kinabuhi o pamuyo.
Ang punto, walay maayong sangputan ang pagpalabi ilabina kon negosyo o panginabuhian. Sabota-sabota lang. Ayaw palabi. Ayaw pagkinurakot. Ug unta dili na mahitabo ang sama sa Virgin Island.
