Ang walhong grupo sa New People’s Army (NPA) sa Bohol niingon nga anaay mahitabong engkwentro tali nila ug sa armadong kusog sa mosunod nga katuigan.
Ang maong bahad pinaagi sa suwat gipadangat sa usa ka istasyonan sa radyo sa dakbayan sa Tagbilaran.
Unod usab sa maong suwat nga ang bag-o lang nitahan nga high-ranking official sa Bohol Party Committee, dili kuno secretary general sukwahi sa giingon sa mga otoridad.
Ug walay epekto ang maong pagtahan sanglit dugay na man kini nga dili kuno aktibo sa maong komitiba.
Ang suwat nga giingong gikan sa Bohol Provincial Party Committee nga ilawom sa CPP-NPA niingon nga dili tinuod ang gisulti sa militar ug ni Gob. Aris Aumentado nga nihinay na ang walhong pundok dinhi sa probinsya.
Nangatarungan pa kini sa maong suwat nga nilampos matud pa ang CPP-NPA sa pagpabarog sa bag-ong natukod nga larangang guerilla nga mao ang Central West Front o Mount Candungao NPA Operation Command.
Niining pagsuwat, wala pa’y reaksyon ang militar, PNP ug Kagamhanang Probinsyal sa maong bahad.
Ang paggamit og armas o lakang nga makamugna og kagubot ilabina kon anaay maamong nga mga inosenteng kinabuhi, walay maayong padulngan apan makapasamot na hinuon sa sitwasyon.
Kon mahimo, ipaagi gayud sa mga dayalogo aron magmalinawon ug mahimong hapsay ang lalawigang Bol-anon. Kay ang hapsay ug malinawon nga katilingban, maoy sinugdanan sa dayag nga kalambuan ug kauswagan sa katawhan.
Apan hangtud ana-a kuno ang mga kurakot nga opisyales sa gobyerno, bati nga pamalaod ug ana-a ang inhustisya o pagdaug-daug sa mga kabus, dili mapapas ang walhong kalihukan. Kay matud pa, kana ang hinungdan sa ilang presensya sulod na sa pipila ka dekada.
