USA ka two-storey nga balay nga gipanag-iyahan sa usa ka German national ug asawa niining Pinay naugdaw sa sunog gumikan sa electrical ignition tungod sa electrical wire nga napanit didto sa Purok-4, Brgy. Napo, lungsod sa Loon, Sabado sa gabii.
Ang panimalay gipanag-iyahan nila ni Ulrich Prenken, 66 anyos, minyo ug Corazon Prenken, 53.
Sigun ni SFOI Anacleto Piscos Jr. sa Loon Fire Station nga nahinabi sa BBDN ug sa Bee Sunrise News nga nadawat nila ang alarma mga alas 6:06 sa gabii. Diin ang kalayo didto nagsugod sa first floor sa lawak nga bahin sa magtiayon. Ug may naka-stock nga daghang papel, foam ug mga sinina.
“Dali ra kaayong mikuyanap ang kalayo gumikan sa mga stock nga papel, foam lakip na sa mga sinina, ” butyag ni Piscos.
Matud ni Piscos nga ang maong balay mixed kini sa kongkreto ug hardwood kun kahoy.
Ningresponde ang duha ka fire sa Loon Fire Station ug usa ka fire truck sa Calape Fire Station sa maong dapit.
Gideklarar nga under control ang maong sunog mga alas 6:57 sa gabií ug na fire out mga alas 7:34 sa gabií.
Matud ni Piscos nga wa makatabok ang kalayo sa silingang balay gumikan kay dunay firewall sa balay sa maong langyaw.
Way gikatahong dunay naangol atol sa maong hitabo. Apan dunay estorya nga may sibilyan nga nasamad kay naigo sa sin.
Gibanabanaang moabot ngadto sa P1.4 milyones ang inisyal nga danyos sa maong hitabo. (ALAN ANDY NALZARO DALAGAN)
