Ang Bohol himoong bag-ong sentro sa Armed Forces of the Philippines (AFP) sa Kabisay-an.
Kini gibutyag ni Gov. Erico Aris Aumentado sa iyang post #AbanteBohol sa Facebook.
“Akong gidawat ang pagbalhin sa (AFP) Central Command sa Kabisay-an,” nagkanayon si Aumentado.
Matud pa sa gobernador, nakigtagbo kaniya ang mga gitahasang opisyal sa AFP aron hisgutan kining maong kalambuan.
Lakip sa nakigkita sa gobernador sila si Col. Edgar Mangabay, Lt. Col. Joey Baybayan ug Lt. Col. Emmanuel Gallo.
“Kinahanglan silang mobalhin gikan sa Sugbo ug mangita og 40 ka ektarya nga yuta sa atong probinsya,” sumala pa ni Aumentado.
Dugang pa niya, ang Bohol ang gipili nga balhinan sa AFP Visayas Central Command.
“Gihisgutan namo ang plano nga ang Ubay ang gamitong lugar kay way makahatag og halapad nga lugar duol sa airport,” sumala pa ni Aumentado.
Pulis Valenzuela
giakusahag rape
Usa ka sakop sa Valenzuela City Police Station ang giakusahan ug rape sa 9 anyos nga anak sa iyang gikapuyo.
Gimanduan ni Col. Ponce Rogelio Peñones, Northern Police District Director, ang pagpasaka ug kaso.
Sumala pa ni Peñones, ang bata nga anaa sa Grade 4 sa Barangay Dalandanan giubanan sa iyang inahan. Matud sa taho sa Manila Times, ang suspetsado giila nga usa ka Cpl. Reynold Agbao Panao, 38.
Matud sa Times, ang krimen nahitabo niadtong Sabado sa pinuy-anan sa biktima sa Sumilang Subd.
Ang suspetsado gipresentar kang Peñones ug Valenzuela Mayor Weslie Gatchalian. Pareho kining mipasalig sa pamilya sa biktima nga pasakaag kasong kriminal ang suspetsado.
