NAANGOL ang usa ka barangay kagawad human aksidenteng nabanggaan ang gimanehoan niining motorsiklo sa usa ka truckvan didto sa Barangay Upper De lapaz, lungsod sa Cortes mga alas 10:00 sa buntag niadtong Martes.
Ang biktima giila nga si William Fronteras, 72 anyos, lumad nga lumolupyo sa Purok-3, Brgy. Loreto, Cortes, Bohol.
Sigun sa taho nga samtang ang biktima luwan sa usa ka motorsiklo gikan sa siyudad sa Tagbilaran padung na untang mopauli. Dihang pag-abot sa maong dapit, aksidenteng nabanggaan sa likod nga bahin sa usa ka truckvan nga gimanehoan ni Raymond Sanchez, 53, lumad nga taga 29-a, Peñaflor, Tagbilaran kinsa kalit ning-overtake nga alanganin hinungdan sa maong insidente.
Nahiagom ang biktima og mga angol sa iyang kalawasan. Ug daling gihatud didto sa Gov. Celestino Gallares Memorial Hospital sa siyudad sa Tagbilaran.
Padayon pang gisusi sa kapolisan ang maong hitabo. ( ALAN ANDY NALZARO DALAGAN )
