PANGLAO – Samtang nanghasi ang dautan nga panahon, duha ka motor ang nahiagum sa disgrasya samtang nagsubay sa Panglao International Road Biernes alas 10:50 sa buntag.
Nasayran nga ang biktima nga nailhan nga usa ka Cherby Hornijas, taga Barangay Bingag, lung-sod sa Dauis. Samtang nagsubay kini sa nahisgutang dalan, kalit nga nawad-an ug control paghidangat sa eskina ang motor nga usa abuhon nga may badlis nga dalag nga Honda.
Tungod niini, nalamba ang maong motorsiklo sa lain usab nga motorsiklo nga usa ka pula nga Suzuki Sky nga gimaneho sa usa 16 anyos nga menor de edad nga taga Tawala, Panglao.
Segun sa pasiuna nga imbestigasyon, si Hornijas nagsubay gikan sa Barangay Lourdes ug ngadto na sa Airport road dihang nahitabo ang disgrasya sa eskina.
Daling gidala sa tambalanan sa dakbayan sa Tagbilaran si Hornijas sa nirespondeng ambulansya sa lungsod sa Panglao. Gamay ra ang angol nga nahiaguman sa menor de edad.
Ang duha ka motorsiklo gidala ug atua karon sa kwerpo sa kapulisan sa Panglao alang sa dugang pa nga pakisusi. (ERN PAHAYAHAY)
