PATAY ang usa ka empleyado sa bangko human gipusil sa duha ka tawo nga nagmotorsiklo sa nasudnong dalan didto sa Brgy Cansumbol, lungsod sa Bilar mga alas 8:10 sa buntag kagahapon, Septiyembre 19.
Ang biktima giila nga si Allen Rosales y Torreon, 39 anyos, minyo, collector/ office messenger sa Banco Bank nga nagbase sa lungsod sa Carmen ug lumolupyo sa Brgy. Zamora, lungsod sa Bilar
Sigun ni PSSg Jerome Sugabo sa Bilar Municipal Police Station nga samtang ang biktima luwan sa íyang Suzuki Raider 150 kolor blue nga motorsikllo, nagdagan padung sa iyang gitrabahoan. Giingong gisundan sa wa mailhing mga suspetsado nga nagsakay sa wa matino brand sa motorsiklo, dihang pag-abot sa maong dapit, gipusil sa backrider sa makadaghang higayon ang nasampit nga biktima. Hinungdan nga natumba sa karsada.
Matud ni Sugabo nga nadala pa sa Cong. Simeon Toribio Memorial Hospital sa lungsod sa Carmen ang biktima apan gideklarar nga patay na sa niatiman nga doktor.
Nisibat ang mga mamumuno padung sa direksiyon ngadto sa lungsod sa Batuan.
“Wa pa mi makita nga motive kay kamolo pa ang among imbestigasyon,” butyag ni Sugabo.
Nibutyag ang imbestigador nga way rekord sa ilang buhatan ang naasoy’ng biktima.
Narekober sa nahitaboan ang upat ka kabhang sa bala sa kalibre .45.
Dugang ni Sugabo nga ila usab nga gisusi ang kuha sa CCTV camera sa maong dapit. (ALAN ANDY NALZARO DALAGAN)
