GITULIS sa wa mailhing nag-inusarang suspek ang MJC Gasoline Station nga nahimotang didto sa Barangay Poblacion, lungsod sa Alicia mga alas 2:50 sa hapon niadtong Huwebes.
Sigun sa imbestigasyon sa Alicia Police Station nga ang wa mailhing suspek luwan sa usa ka KLX nga motorsiklo, nisulod sa maong gasolinahan nga gipanag-iyahan ni Jermila Cuñado ug nagpatubil sa pump boy nga si Gaudioso Virtudazo.
Samtang gitubilan, daling niduol ang suspek ngadto sa kahera nga si Ginaly Jadraque, 43 anyos, minyo, taga Brgy. Napo, Alicia ug nition sa iyang gibitbit nga wa matinong kalibre sa armas ug nideklarar og hold-up, dayong gisikwat ang salapi kantidad og P9,000 nga halin niadtong adlawa.
“Tungod sa kahadlok, gihatag sa cashier ang halin, ” butyag ni PSSg Keith Garcia sa Alicia PNP.
Matud ni Garcia nga daling nisibat ang tulisan padung sa Brgy. Progreso, Alicia ug lagmit molargo kini sa Pilar o kaha sa Ubay.
Gihulagway ang suspek nga may pamarog sa gitas-on nga 5’6″ ngadto sa 5’8″, nagsuot og kolor itom nga jacket ug kolor itom nga short pants.
Padayon pang gisundan sa kapolisan ang maong insidente. ( ALAN ANDY NALZARO DALAGAN )
