USA ka lab-asero kinsa gialegar nga namaligya og giingong shabu, giposasan atol sa buy-bust operation sa kapolisan didto sa Purok-3, Barangay Poblacion, lungsod sa San Miguel mga alas 10:30 sa gabii niadtong Dominggo.
Ang suspetsado giila nga si Mark Anthony Legones y Bongator, 29 anyos, ulitawo, watchlisted/SLI, residente sa Purok-5, Brgy. Mahayag, San Miguel.
Ang ginsakpan sa Municipal Drug Enforcement Team sa San Miguel Municipal Police Station, nagpahigayon og buy-bust operation sa maong dapit nga niresulta sa pagkasikop sa maong suspek.
Napalitan ang suspek sa usa ka polis poseur-buyer og usa ka putos nga giingong shabu kantidad og P500.
Laing tulo ka gagmay’ng putos nga may sud gituohang shabu ang nakuha gikan sa iyang posisyon.
Gibilanggo na sud sa selda sa San Miguel PNP ang maong dinakpan. ( ALAN ANDY NALZARO DALAGAN )
