Nanawagan si Kalihim Benjamin Abalos Jr. ngadto sa tanang mga koronel ug heneral sa Philippine National Police (PNP) nga boluntaryong mokanaug taliwala sa naghitak na droga uban ang pagduda nga daghang mga taas nga opisyales ang may kalambigitan niini.
Sa usa ka bahin, nagpakita og kaisog si Abalos di lang sa pag-angkon nga nagkagrabe ang suliran sa iligal nga droga sa nasud. Iya usang giangkon ang dugay nang nasayran sa katawhan: nga dunay mga opisyales sa kapulisan nga nahilambigit niini.
Ang suliran sa droga dinhi sa nasud usa ka bukas nga sekreto. Sekreto kay gitago-tago man tungod kay iligal, apan bukas kay nagsugod na nga lantaran ang pagpamaligya niining gidili nga butang.
Gani, bisan si kanhi Presidente Rodrigo Duterte nahikugang sa dihang nasayran na niya kon unsa diay kadaku kining maong negosyo bisan pa nga siya ra ang kusganon nga nagpasidaan batok niini sa mga nagpapili niadtong 2016.
Tinuod nga daku kaayog pag-us-os sa pagpamaligya sa gidili nga droga sa iyang pamunoan, apan bisag kinsay pangutan-on nibalik og kakusog ang pagpayuhot niini wa pay tuig human mikanaog si Duterte.
Usa sa nakaingon niini mao ang mga pamahayag ni Chief PNP Rodolfo Azurin Jr. nga daw nagpahimangno sa mga kapulisan batok sa kusganong pagpanggukod sa mga sindikato. Bisan pag giunsa ni Azurin og pagpahiluna aron kunohay tul-iron ang sayop nga pagsabut sa iyang pamahayag, di ikalimod ang mensahe nga sukwahi kini sa pamaagi ni Duterte.
Sa gihimong pamahayag ni Abalos, sama ra nga giangkon sa kalihim sa Department of Interior and Local Government nga nidaku pag-ayo ang suliran sa droga hinungdan nga kinahanglang mokanaug ang mga opisyales gikan sa koronel pataas aron masulbad kini.
Apan sipyat si Abalos sa maong panawagan, Kon duna siyay ebidensya sa maong kalambigitan, nganong di man niya pasakaan og kaso ang mga hingtungdan? Ug wa siyay ebidensya, unsa may iyang basehanan sa maong panawagan?
Apan ang mas dakung problema sa maong panawagan mao nga giratsada ni Abalos ang tanang mga opisyal. Sad-an ug way sala, kinahanglang mokanaug kon tumanon ang iyang awhag. Ambut og asang planetaha ni gikan si Abalos nga wa man siya masayod nga di mahimong silotan ang inosente sa sala nga nahimo sa uban.
Sa way pagduha-duha, iresponsable ang maong panawagan. Di kini angay nga litokon sa kinatas-ang opisyal sa ahensya diin nasakop ang PNP. Sa iyang pamahayag, gipakita ni Abalos nga wa siya makaila kon kinsa ray sad-an ug kinsay inosente. Labaw pa niini, wa siya masayud og unsay angay buhaton aron masulbad kining maong suliran. Og duna man galing angay nga maoy unang mokanaug, kini way lain kung di si Abalos mismo.
