LALAKI nga gitumbok nga usa ka high value individual pusher kun HVI nadakpan ug nabawian og halos katunga ka milyon ka pesos sa gidudahang drugas sa buy-bust operation didto sa Purok-8 Brgy. Songculan, lungsod sa Dauis mga alas 2 sa sayong kabuntagon kagahapon.
Ang suspetsado giila nga si Jeffrey Dacol, y Estrada, 27 anyos, ulitawo, lumad sa Sitio Singko Brgy. Mas-ing, Dagohoy, Bohol ug kasamtangang nagpuyo sa Calceta Street, Brgy Cogon, siyudad sa Tagbilaran.
Ang ginsakpan sa intelligence section sa Dauis Municipal Police Station pinangulohan sa bag-ong hepe sa kapolisan nga si PLT. Thomas Zen Cheung nagpahigayon og anti-illegal drug operation didto sa maong dapit. Ug niresulta sa pagkasikop sa maong suspek.
Narekober gikan sa posisyon niíni ang gidudahang drugas nga gibanabanaang motimbang ngadto sa 60 gramos ug may Standard Drug Price nga mokabat ngadto sa P408,000.
Kasamtangang gisud sa selda sa Dauis PNP ang maong dinakpan ug pasakaan og sumbong paglapas sa Akta Republika 9165 kun Comprehensive Dangerous Drugs Act of 2002 sa piskaliya. (ALAN ANDY NALZARO DALAGAN)
