PATAY ang usa ka 56 anyos nga lalaki kinsa gituhoang ubos sa gahom makahubog nga ilimnon human madasmagi og motorsiklo sa Barangay road, P3 Brgy. Imelda 2 lungsod sa Ubay pasado alas-9:00 ang takna sa gabii sa adlawng Biernes.
Giila ang biktima nga usa ka Nelson Abayabay, Sr. y Cadorniga, minyo ug nagpuyo sa P5 sa samang barangay.
Ang nakadasmag nga motorsiklo usa ka Honda TMX 125 color itom, walay plaka ug gimanehoan sa usa ka Marjun Ycong Cuyag, 21, ulitawo ug residente sa mao gihapong dapit.
Taho nga nahipos sa kapolisan pinaagi sa Initial Report nga hinikay ni PCpl. Jerome C. Torrefranca nagkanayon nga mga alas-10:00 ang takna sa kagabhion nadawat sa buhatan Ubay MPS ang alarma kabahin sa maong panghitabo.
Sa paghidangat sa mirespondeng kapolisan, maoy ilang naabutan ang mga personahe sa TARSIER 117 nga mihimo og CPR kun Cardiopulmonary Resuscitation sa biktima nga nawad-an sa panimuot sa tinguha nga mapabalik ang panimuot.
Apan, matud pa, walay nakitang timailhan nga may kinabuhi pa ang maong biktima.
Ang pasiunang imbestigasyon nagbutyag nga motorsiklo nagdagan sa maong dalan, sa unahan, nakita sa drayber ang biktima nga naglakaw sama sa hubog daplin sa kalsada.
Tungod niini, matud pa, mipahinay pagpadagan ang motor sa pamasin nga motabok sa pikas nga, apan sa dihang nakita sa drayber nga mihunong paglakaw ang biktima, mi-inggansa pagpadagan ang drayber apan kalit nga milabang ang biktima ug misulay pagpreno sa motor ang nagmaneho apan ulahi na, hinungdan sa pagkadasmag.
Sa laing bahin, suspek nakasinati usab og angol sa kalawasan. ###REYLAO/Wenny Reyes /Alan Andy Nalzaro Dalagan
