GIKATAKDANG pagasugdan sa komitiba sa Sangguniang Panlalawigan ang imbestigasyon kabahin sa kuwestiyonable nga pag-revoke ni kanhi gobernador Art Yap sa usa ka Memorandum of Agreement kun MOA niadtong tuig 2008 tali sa Bureau of Jail Management and Penology kun BJMP.
Si Second District Board Member Tomas Abapo Jr., Chairman sa Committee on Public Accountability nibutyag nga gihipno na sa pagkakaron ang himoong imbestigasyon diin imbitahan ang mga personahe sa Bohol District Jail ug mga abogado sa Provincial Legal Office.
Nasayran nga usa ka Memorandum of Revocation kun MOR ang gipirmahan niadtong December 18 tuig 2020 ni Yap tali ni Superintendent Efren Nemenio sa Bureau of Jail Management and Penology Region 7 nga nag-revoke sa Memorandum of Agreement tali sa Provincial Government sa Bohol ug BJMP niadtong Septiyembre 26, 2008.
Ang MOR maoy gihimong basehan aron ibalik sa kapitolyo ang pagdumala sa BDRC nga karon BDJ gikan sa pagdumala sa BJMP.
Nasayran usab nga epekto niadtong Enero 1 sa milabay’ng tuig ang pag-revoke sa MOA ug ang pagpahigayon sa imbentaryo sa mga gamit sa maong pasilidad apan nasayran nga way natala ang Sangguniang Panlalawigan nga resolusyon nga nagtugot kang Yap sa pagpirma sa MOR.
Gawas niini nasuta usab nga niadtong tungang bahin sa tuig 2021, dihay gi-execute nga Deed of Usucruft sa jail facility pabor sa BJMP apan wa kini maimplementar. ( AND )
