NAGBAHAD ang mga anaa sa walhong kalihokan kun New People’s Army o NPA dinhi sa probinsiya sa Bohol sa posibleng pagtumaw sa usa ka engkuwentro batok sa armadong kusog sa goberno sa mga mosunod nga katuigan. Nunot kini sa nagpadayon usab ang ilang pagpundar og dugang puwersa.
Kini maoy usa sa mga unod sa suwat nga gikan sa Bohol Provincial Party Committee ilawom sa Communist Party of the Philippines New People’s Army nga gipadangat sa sibyahanan sa radyo niadtong Huwebes.
Ang suwat una mipaklaro sa kamatuoran kabahin sa pagkatawo sa gitumbok nga high ranking official sa walhong kalihokan nga si Elizar Nabas kinsa bag-ohay lang mitahan sa iyang kaugalingon ngadto sa mga otoridad pinaagi ni Gobernador Aris Aumentado.
Matud sa suwat nga si Nabas sakop kini sa Bohol Party Committee apan dili siya secretary general sukwahi sa gipadayag sa mga otoridad.
Ang pagtahan usab ni Nabas matud pa nga way dakong epekto sa padayong kalihokan sa mga anaa sa walhong pondok sanglit dugay naman usab kini nga mipahuway sa Bohol Party Committee.
Gihimakak usab nga ang pag-angkon sa military ug ni Aumentado nga mihinay ang mga kalihokan sa walhon sa Bohol apan paggukod sa military giingong milampos hinoon ang CPP-NPA sa pagpabarog sa bag-ong natukod nga larangang guerilla nga mao ang Central West front o Mount Candungao NPA Operation Command dinhi sa probins6ya. Ug tungod niini, nibahad ang grupo nga dunay mahitabo nga panag-engkwentro tali sa puwersa sa goberno sa mosunod nga mga katuigan. ( AND )
