GIALEGAR nga aduna nay nakit-ang kahiwian o irregularity ang Office of the Governance Accountability and Review kun OGAR sa administrasyon ni kanhi gobernador Art Yap.
Kini ang gipamahayag ni kanhi Tagbilaran Mayor Dan Neri Lim, usa sa mga consultant sa OGAR atol sa interview sa radyo kagahapon sa buntag.
Si Lim miingon nga ilang ipagawas ang ilang inisyal findings sa ilang gihimong pag-utingkay human sa ilang pagahimoom usab nga tigom karong Disyembre 9.
Matud ni Lim nga sa pagkakaron ilang gitotokan una ang pag-imbestigar o ang pagpadagan sa panalapi sa kapitolyo sa kanhi administrasyon.
Ila usab nga ipatawag pagbalik sa mga mosunod nga semana si Provincial Budget Officer Peter Ross Retutal aron mapalawman ang pagahimoon nga imbestigasyon sa pagpadagan sa budget sa kanhi administrasyon.
Gisiguro usab ni Lim nga magpadayon ang ilang imbestigasyon dili lang sa administrasyon kundili apil usab sa niaging mga namunoan nila ni kanhi gobernador Edgar M. Chatto ug kanhi gobernador Rene Relampagos. ( AND )
