Bisan pa og maayo ang dagan sa ekonomiya sa usa ka nasud, probinsya o lungsod, dili gayud kini mahimong magmalungtaron kon ana-a ang hulga sa kagubot ug kreminalidad. |
Ang lalawigan sa Bohol sa niaging administrasyon dili ikalalis nga daghang kagubot ug kreminalidad ilabina ang presensya sa mga nihawa sa sabakan sa gobyerno ug ang suliran sa ilegal nga tambal.
Sa pagsugod sa bag-ong administrasyon, mura’g giduwaan usab sa panahon ug ang uban niingon nga basin ‘pakulo’ kuno sa mga gustong duhigan ang administrasyong Aumentado.
Apan sa nataho niining pamantalaan gahapon, maayo ang dagan sa liderato ni Gob. Aris.
Sugod sa buwan sa Hulyo ug Agosto, niubos ang “criminality rate” dinhi sa probinsya ngadto sa 34 porsyento.
Kini tungod sa pagtutok ni Aris nga mapahamtang ang kahapsay ug kalinaw dinhi. Dako og gikatabang ang gipahigayon nga “peace and order council” sa mga lider sa ahensyang hingtungdan niini.
Usa sa gitan-aw nga angay hatagan og pagtagad ang seryosong problema sa ilegal nga drugas dinhi, ilabina makapakgang kini sa hayag nga kaugmaon sa kabatan-onan.
Ug hangtud karon, nagpadayon ang paghimo og mga maayong lakang aron mopatigbabaw ang kahapsay ug kalinaw dinhi sa Bohol.
Dili magmalampuson si Gob. Aris ug ang mga otoridad nga nagtutok niini kon walay seryosong partisipasyon sa katawhang Bol-anon.
Kutob sa mahimo, tabangan sa katawhan ang gobyerno aron dili mapalyar ang nagsugod na nga pag-abante sa Bohol.
Ang matag usa anaay dakong papel alang sa malungtarong kahapsay ug kalinaw aron mabalik ang gihulagway nga kanhi “paraiso” — ang Bohol, ug dili kini imposible kon ana-a ang pagtinabangay.
