UBAY, Bohol, Nov 28 (PIA) –Mahimong kamultahan ang usa ka Local Government Unit (LGU) sa iyang pagkapakyas sa pagpahimutang sa Local Disaster Risk Reduction Management Office (LDRRMO) subay sa gilagda sa Republic Act 10121 o Disaster and Risk Reduction Management Law.
Importante ang DRRMo sa usa ka lugar, kay kini ang tugyanan sa pagmugna sa mga programa, kalihukan ug proyekto nga pagpa-asdang sa DRRM, subay sa Section 12 sa nahigutang balaod, dason ni Girlie Alvarez, didto sa nagpadayon nga bansaybansay sa mga local nga sakop sa media sa Bohol aron gamhan sila sa pagpatubag sa mga nahitungdan sa obligasyon sa pagtubag sa pagpangandam batok sa katalagman.
Si Alvarez, kinsa sakop sa nasudnong media, resource speaker sa nagpadayon nga bansay, ug usa usab ka sakop sa bahan sa Office of the Civil Defense nga magtimbang sa mga LGUs kabahin sa ilang pagpatuman sa Disaster Law.
Sa section 20 sa mao gihapon nga balaod, mahimong kamultahan og P50 mil ang magpasagad sa iyang gimbuhaton ug mapamatud-an nga sa iyang ka tamhang, kini makaingon nga may kadaut, pagkapilde sa kinabuhi, may pagkaguba ug pagkadaut sa mga pasilidad nga iya sa kagamhanan u gang dili sakto nga pagggamit sa disaster funds.
Gawas sa multa kon mapruwebahan sa korte sa iyang pagtamhang, gawas sa posibleng labing dako nga multa nga mahimo pang moabut og halos tunga sa milyon, mahimo pa nga mapaslak sa bilangguan sa dili mokubos sa unom ka tuig, tibuok kinabuhi nga pagka disqualify sa pagdagan sa eleksyon.
Dinhi sa Bohol, ania ang bansaybansay sa Piloting Accountability Journalism aron tun-an ang mga sakop sa media sa pagpatubag sa mga hingtungdang opisyal sa pag-umol og mga programa, proyekto ug kalihukan aron kalikayan o kamenosan ang epekto sa katalagman.
Ang epekto niining bansaybansay, mahimong maoy sumbanan sa mga bansaybansay usab nga himoon sa mga sakop sa media sa tibuok nasud, aron may mapatubag na sa kapakyas sa kagamhanan sa paghatag sa ilang gipanumpaang serbisyo, ilabi na sa pagfpakunhod sa epekto sa kadaut dala sa katalagman. (RAHC/PIA_7/Bohol)
