GISUGDAN na sa Task Force Isda ang pagbutang og mga stall sa isda sa kamerkadohan sa siyudad sa Tagbilaran isip kabahin sa paningkamot sa kapitolyo nga mabati sa mga konsumidor ang barato nga isda.
Si Salvio Madangguit sa Provincial Agriculture Office niingon nga sa pagkakaron duna nay naka-display nga isda sa Tagbilaran Central Public Market lakip na sa Causeway ug isunod ang mga merkado sa Cogon, Manga, ug uban pa.
Gawas sa Tagbilaran, mobutang usab og display ang Task Force Isda sa mga merkado sa lungsod sa Baclayon, Panglao, Dauis ug uban pa.
Ang nahisgotang lakang subay sa hangyo sa publiko ilabina niadtong layo sa mopalit og isda nga barato sa daang tugpahanan.
Gipaabot usab ni Madangguit nga ang gihimong lakang sa Task Force Isda dili kompetensya sa ubang mga negosyante kundili pagpadangat og mensahe nga mopaubos usab sa ilang nga baligya nga mga produkto. ( AND )
