TAGBILARAN CITY, Bohol, Oct 25 (PIA) –Kon ikapatuman na ang ordinansa, makasapi ang lungsod nga makadakop sa mga sakyanan nga nagkarga, pasahero nga nagpalusot ug tuyo gayud nga nagdala og presko nga karne o niluto na, o giproseso pasulod sa Bohol.
Sa Sangguniang Panlalawigan Ordinance No. 2022-011 nga nagpabag-o sa Provincial Ordinance No 2021-015 nga giluohanan og Prohibiting the Entry of Live Pigs, Pork, Pork products and Frozen Semen coming from African Swine Fever (ASF) Affected Areas and Providing Penalties Therefor, napadayag didto nga kon masakpan nga wala itahan ang dala nga karne o niluto nga baboy sa mga Veterinary Quarantine Service Team, gawas nga embargohon ang illegal nga karne, multahan pa gyud og P1,000 ang nakalapas.
Kini sa tumong nga pugngan gyud ang pagsulod sa ASF sa Bohol kay binilyon sa pesos ang indutriya sa pangbaboyan sa Bohol ang possible nga maangin kon makasulod ang sakit.
Ang ASF, sakit sa baboy nga grabe ka mananakod, ug gani, mahimo nga ang tawo na ang magdala sa kagaw niini ngadto na sa laing baboy.
Kon makasulod sa Bohol ang sakit, kasagaran, dili na kini mapugngan hnagtud mapuo ang mga baboy dinhi, matud ni Dr Stella Marie Lapiz, Provincial Veterinarian ug ASF Task Force Team Leader.
Hinuon, sa katapusang higayon, aron makalikay sa multa ang inosente nga nakadala sa maong illegal nga karga, ang mga tinugyanan sa ASF sa Bohol magpahimutang sa mga sudlanan nga kalabayan sa mga karne o niluto nga karne, o giproseso nga karne sama sa chorizo, longaniza, chicharon, sa mga agi-anan gawas sa barko.
Kini alang sa mga boluntaryo nga molabay niining nga illegal nga karga, sa dili pa mahidangat sa Veterinary Quarantine Service Team, kanus-a, segurado na ang multa.
May mga iro usab nga gipakatag sa mga pantalan ug tugpahanan aron makasimhot sa mga bagahe aron walay makalusot nga karne.
Sa multa, segun sa section 6 paragraph 2 ug 3 sa nasampit nga ordinansa, kini pagabayran dayun diha sa Buhatan sa Tesorero o sa natahasan niini diha sa lungsod diin madakpi, ug ang Provincial Government of Bohol ug ang Municipal Local Government, nagbahin og tagtunga sa nakolekta nga multa.
Ang na-embargo nga karne, nga gipalusot, humigon dayon sa pamatay-kagaw ug dauban sa labing dali nga panahon.
Ug sanglit ang Ordinansa naglakip sa pagpugong sa pagpasulod sa mga lawog sa baboy nga gikan sa mga lugar nga apektado sa ASF, P5,000 ang multa sa mga masakpan, bisan pa nga ipabalik ang nasampit nga kargamento didto sa pantalan nga gigikanan, ug ang nagpakarga niini ang manubag sa galastohan.
Niini, P2,500 na usab ang mabahin sa lungsod nga makasakop sa palusot.
Ug kon pananglit ang mismo ang barko, bus o eroplano ang nagpakarga niini, o wala mopahibaw sa mga pasahero kabahin sa pagpasulod sa illegal nga karga, ang kapitan sa barko, o ang driver sa bus ug piloto sa eroplano ang kamultahan sa P5,000.
Tunga gihapon ang lungsod u gang Bohol sa multa nga mahipos.
Tungod niini, kon ang lungsod magpasweldo og us aka tawo nga tahasan sa estrikto nga pagbantay sa palusot, dali ra niini nga mabawi ang isuhol sa taw okay makapaninanpi na kini bisan sa multa lamang. (RAHC/PIA_7/Bohol)
