USA ka gambalay nga lutoanan og chicharon partial nga nasunog sa wa pa mahibaw-i nga hinungdan didto sa Gregorio Bandija Street, Purok 5, Brgy. San Isidro, siyudad sa Tagbilaran mga alas 5:32 sa hapon kagahapon, Nobiyembre 6.
Ang establisamento nga hinimo sa mga light materials gipanag-iyahan ni Roy Obtenario, taga Brgy. Dao, siyudad sa Tagbilaran.
Si SFO1 Richen Roslinda sa Tagbilaran City Fire Station nga nahinabi sa BBDN nibutyag nga ílang nadawat ang alarma mga alas 5:35 sa hapon. Ang maong sunog nakontrolar kini mga alas 5:45 sa hapon ug gideklarang na fire out o napalong mga alas 5:48 sa hapon.
Matud ni Roslinda nga way gikatahong dunay naangol sa maong hitabo ug wa kini makatabok sa laing lugar kay isolated kun layo sa mga balay.
Gawas sa mga bombero sa City Fire Station, niresponde usab ang fire truck sa Çity Disaster and Risk Reduction Management Office kun CDRRMO.
Matud ni Roslinda nga ang inisyal nga danyos sa hitabo mokabat ngadto sa P137,000.
Dugang niya nga under investigation pa ang insidente. (ALAN ANDY NALZARO DALAGAN)
