DUGAY nang gipangandoy sa mga Bol-anon nga dunay mga buhatan sa ahensiya sa nasyunal nga kagamhanan nga mapahiluna dinhi sa lalawigan sa Bohol.
Gumikan niini, gitanyagan ni Gobernador Aris C. Aumentado ang pipila ka mga buhatan sa national government nga mobutang sa ilang satellite office dinhi sa Bohol aron maghatag og kasayon sa mga Bol-anon nga dunay mga transaksiyon sa maong mga buhatan.
Sigun ni Aumentado nga gihimo niyang national agency hub ang Governor’s Mansion diha sa CPG Avenue, Brgy. Cogon, siyudad sa Tagbilaran.
Matud sa gobernador nga iya nang gitanyagan ang Department of Foreign Affairs (DFA), Overseas Workers Welfare Administration kun OWWA ug ang Land Transportation Franchising and Regulatory Board (LTFRB) nga magbutang og buhatan dinhi.
Nagpakita og interes ang maong mga buhatan nga mopahiluna og opisina sa Bohol human nga adunay andam nga lugar alang kanila.
Sa pagka-karon, ang mga taga Bohol nga adunay transaksiyon sa maong mga ahensiya kinahanglan pang mobiyahe paingon didto sa Dakbayan sa Sugbu diin makagasto kini og dakong pundo aron lang makakuha sa ilang panginanghalong mga papeles. ( AND )
