TAGBILARAN CITY, Bohol, Oct 13 (PIA) –Namaligya ka ba og karne sa online market? O tigpalit ka ba hinuon?
Nasayud ka ba diin kining karneha gikan, walay sakit ang gi-ihaw, dili ba kini double dead o luwas ba kini nga kan-on?
Kana nga mga pangutana imong lamang matubag kon may makit-an nga mga dokumento gikan sa National Meat Inspection Service (NMIS) sa Department of Agriculture Bureau of Animal Industry, sa karne nga imong gipalit.
“Tanang karne nga giihaw gawas sa mga ihawan nga adunay pagtugot ug akreditasyon sa DA, magtangag gayud sa tatak sa NMIS aron ipamatuod sa mga konsumidor nga limpyo, walay sakit ug luwas kan-on ang karne,” pasabut ni Dr. Stella Marie Lapiz, dungan sa pagduaw sa National African Swine Fever Prevention and Control Program (NASFPCP) Team dinhi sa Bohol Oktubre 11-12.
Ang pahayag ni Dr. Lapiz, kinsa maoy Provincial Veterinarian, base usab sa National Meat Inspection Code of the Philippines, ang balaod nga nagdeklara nga polisiya sa estado ang pagpugong sa pagsulod ngadto sa mga establisemento sa mga hayop nga nagdala og sakit, ug sa pagseguro nga limpyo ug luwas ang mga karne ug mga produkto gikan niini nga kan-on.
Sa pamaagi sa ilang pamaligya sa online sa barato nga karne apan walay kasegurohan gikan sa mga tinugyanan sa ka limpyo ug ka luwas niini, angay ang mga konsumidor nga mangutana kon luwas ba gayud ug limpyo ang karne, dayag ni Dr. Lapiz.
Kini usab samtang hugot ang pagbantay sa Bohol nga dili makasulod nganhi ang African Swine Fever (ASF) nga, dili man makadaut sa tawo, apan makapuo sa mga baboy.
Karon, sa bag-ong ordinansa sa Bohol nga nag-usab sa Provincial ordinance No 2021-015 nga nagpugog sa pagsulod sa buhi o karne sa baboy ug mga produkto kigan niini, sa gipakaging nga semen ug sa mga lawog nga mosulod, ilabi na kon gikan sa mga lalawigan nga apektado na sa ASF, mahimo na nga madakop ang mga tawo nga makasupak sa Ordinansa.
Kadtong mga magpatigayon, magdala, maghupot og magpadeliver sa buhi o karne sa baboy ug mga proukto nga gikan niini sa bisan unsa ka daghanon, ilabi na gayud kon gikan sa mga lalawigan nga apektado sa ASF, gawas nga embargohon ang karne, pamultahon og gikan sa usa ka libo ngadto sa lima ka libo, ug mahimong madugangan pa og pagkapriso hangtud sa 6 ka buwan.
Ang mga eroplano, barko, sakaya sa dagat o bus nga masakpang maoy gikargahan sa gidili nga patigayon, multahan usab og P5 mil, nga adto ibayad sa diin mang lungsod siya madakpi.
Niini, matunga sa multa ang lalawigan sa Bohol ug ang lungsod nga modawat sa multa. (rahc/PIA-7/Bohol)
