TAGBILARAN CITY, Bohol, November 17 (PIA)–Duha ka unit sa solar powered irrigation system (SPIS) nga nagkantidad og P 11.84 milyones nga gipondohan ubos sa Rice Program sa Department of Agriculture-Central Visayas (DA7) ang gi-turn over sa Nueva Vida Sur Farmers Association sa lungsod sa Carmen ning bag-o lang.
Ang Regional Technical Director sa DA7, Engr. Cirilo Namoc ug Agricultural Program Coordinating Officer (APCO-Bohol) Roman Dabalos, uban ni Mayor Conchita Toribio Delos Reyes ang nangulo sa turnover sa SPIS, nga makabenepisyo sa 85 ka mag-uuma ug makapatubig sa 22 ka ektarya nga luna sa humay.
Si Engr. Namoc, sa iyang mensahe nipaambit nga ang DA adunay daghang programa ug proyekto alang sa mga mag-uuma, lakip na ang irrigation network system (INS).
Matud pa niini nga ang SPIS usa sa daghang proyekto sa irigasyon alang sa pagpatuman, nga mahigalaon sa kalikopan tungod kay kini naggamit sa solar energy sa pagbomba sa tubig aron sa pagpatubig sa mga umahan.
Si Mayor Delos Reyes sa iyang bahin niawhag sa mga mag-uumang recipients sa pagtabang sa pagmintinar ug pag-atiman sa mga panel. Matud pa niini nga makabenepisyo kini dili lang sa mga mag-uuma sa bugas sa Nueva Vida Sur kon dili lakip na sa mga silingang mag-uuma gikan sa ubang mga barangay.
Sa laing bahin, gipaambit ni Dabalos nga ang humay maoy usa sa daghang mga tanom nga panguma nga nagkinahanglan og dugang tubig. Ang paghatag ug tubig sa irigasyon makatabang sa pagtubo ug abot sa humay.
Si Ray Lagria Laguitao, presidente sa nasangpit nga asosasyon, nipadayag sa iyang pasalamat sa SPIS tungod kay kini makapauswag pag-ayo sa ilang produksiyon sa bugas. (ecb/PIA7-Bohol)
