Sa way pagduha-duha, ang resulta sa Nursing Licensure Examinations karong tuiga lakip na sa labing makabulohanon sa kasaysayan sa Bohol. Usa ka rason niini mao nga tulo ka mga Bol-anon ang nahilakip sa top 10 sa tibuok nasud.
Nakakuha sa ikalimang pwesto si Glenn de la Cruz Dano samtang ikawalo usab si Keith Lee Caballo Agor, parehong produkto sa Holy Name University. Anaa sa ikanapulo nga dapit si Benz Jim Timbal Gragasin sa Cebu Doctors University.
Tingali di sama kalanog nilang tulo ang uban pang nipasar sa maong licensure exam apan daku kining dungog ngadto sa ilang mga kabanay. Gani, makaingon kita nga kini maoy sinugdanan sa laing pahina sa tagsa-tagsa ka mga kinabuhi. Tungod niini, atong mga pahalipay kanilang tanan.
Apan sa hisgutanan sa bag-ong pahina sa kinabuhi, di na tingali bintahaan ang kalampusan sa mao gihapong pasulit ang kalampusan ni Carla Mae Telmo, ang gikabaniog na karon nga unang nurse nga Badjao.
Si Telmo, 22, usa sa 18,529 nga mipasar sa exam karong tuiga. Bisan pa niini, nasayud siya nga daghan pang mga pagsuway sa kinabuhi ang iyang atubangon tungod kay magpadayon ang pagkamapahitas-on sa katilingban.
Siya ray nasayud og unsay mga pagbiay-biay ug pagtamay nga iyang nasinati sukad sa una niyang pagtungha. Bisan pa sa daghang mga balaod nga gipasar aron did-an ug silotan ang diskriminasyon sa isigkatawo, nagpadayon kini hangtud karong adlawa.
Di kini gamayng butang kung iphon ang tanang mga naghikog tungod ning maong pagpasipala sa isigkatawo. Kung mahimong buling-bulingan kadtong gikan sa mga respetadong bansagon, unsa na kaha ang gikan sa usa ka tribo nga ubos kaayo ang pagtan-aw sa katilingban.
Badjao ang Nurse, o nurse ang Badjao? Kung akoy papili-on asa niining duha ang mas haom, pili-on nako ang ikaduha. Ang una hilom nga pagpasupot sa ubos nga pagtan-aw kaniya tungod sa iyang tribo. Samtang ang ikaduha malampuson nga pagpadayag sa iyang estado sa kinabuhi bisan pa sa iyang kaliwatan.
Wa dinhi matapos ang pakigbisog ni Carla Mae. Matag karon ug unya, madunggan niya kining maong pangutana nga nagtangag og katinga kon di man pagkaminos. Apan lahi ang pagkatawo ni Carla Mae. Iyang gipakita nga di niya tugotan ang mga pagtamay ug pagbiay-biay nga makababag sa iyang mga tinguha.
Tungod sa iyang gipakita, si Carla Mae nahimong simbolo sa paglaum ngadto sa mga Badjao. Kung nahimo niya, mahimo usab kini sa uban. Di tanan, apan kutob nga duna pay sama kaniya nga hugot ang ambisyon, di imposible nga duna pay mosunod kaniya.
