Dili si kanhi Gob. Art Yap ang unang makasuhan sa giingong mga anomalosong transaksiyon panahon sa iyang administrasyon ug sa kasamtangan.
Apan giklaro ni OGAR Chair Jun Evasco nga kasuhan gayud ang kanhi gobernador.
“Ang pangutana man gud kanunay sa gawas, ‘kanus-a man ma file-an si Governor Arthur Yap og kaso?’ Hulat lang mo, mo abot lagi ta ana kay kami diri wala mi mangatulog sa among responsibilidad,” matud ni Evasco sa usa ka press briefing kaniadtong Biyernes.
Suma ni Evasco, ang ebidensya nga nakuha sa OGAR nagpakita sa mga “grave” offenses o grabeng kalapasan nga nahimo sa kanhi administrasyon.
Niingon usab ang maong tsirman sa OGAR nga ilang gibuhat ang ilang trabaho.
“Sultihan mo namo kung unsa ang among [OGAR] kumbati dinhi. Sultihan pud mo namo na grabe ang mga kaso na gi atubang,” ni Evasco pa.
Giklaro usab ni Evasco nga taas nga panahon ang gikinahanglan sa OGAR aron makompleto ug ilang mapasa ang ilang mga “findings” aron masiguro nga ang mga reklamo nga ipasaka makapabanlog gayud sa prisohan sa maong kanhi opisyal sa gobyerno.
Niingon usab si Evasco nga ang OGAR dili magpakaulaw sa mga Bol-anon.
“Ato pa ning utingkayon kay dili mani ingon na file-an nato og kaso unya pagkahuman magpakaulaw lang mi na ‘kaning OGAR pataka laman og file og kaso pero walay basehan.’ Mao ng lalumon gyud nato ni tong pag utingkay,” matud sa kanhi cabinet secretary.
Sakto ang desisyon sa OGAR nga dili maghala-hala sa pagfile og kaso — ‘slowly but surely’ ang punto nga gustong ipaabot ngadto sa katawhang Bol-anon, aron magmalampuson gayud ang krusada alang sa limpyong pang-gobyerno.
