Gipahibawo na sa Office of Governance Accountability and Review kun OGAR ang unang empleyado sa Kapitolyo nga makasuhan, si Larry Pamugas, ang OIC sa Office of the Provincial Agriculturist (OPA).
Kini nigawas human si OGAR Chair Jun Evasco Jr. nisumiter sa mga dokumento ngadto sa Buhatan sa Gobernador kaniadtong Biyernes nga nagrekomendar nga pakasuhan si Pamugas.
Mga reklamong administratibo ang ipasaka nga niturok human giingong nasayran sa mga ebidensya nga naani sa OGAR nga anaay mga kalapasan si Pamugas sa rice program sa gobernador kaniadto nga si Art Yap nga mao ang Advanced Rice Technology (ART) 160 program.
Ang negosyante ug social media influencer nga si Willy Ramasola, kinsa usa sa mga Board of Consultants sa OGAR una ng nihatag og mga pasumbingay kon kinsa ang unang makasuhan, ug base sa mga komento sa iyang Facebook post, usa si Pamugas sa makasuhan duha ka empleyado nga makatilaw og mga kaso.
Daghan ang nalipay nga makasuhan si Pamugas base usab sa mga komento sa laing FB post ni Ramasola diin ang usa ka netizen niingon nga “namugas” gayud kuno si Pamugas. Naila matud pa sa iyang apelyido.
Matud usab ni Ramasola, nga kon on-going na ang kaso ni Pamugas, “preventive suspension para to avoid tampering of records” ang mahitabo sa maong OIC.
Dugang usab sa mga pangutana nga gitubag ni Ramasola pinaagi sa social media, nga kon ma-‘convicted’ isip ‘guilty’ si Pamugas, “Normally terminated and banned from holding public office and forfeited ang retirement benefits.”
Apan kining tanan, taas pa og abtan ilabina kon dili paspas ang pagdagan sa ligid sa hustisya.
Ang panghinaot sa katawhan nga magmalampuson ang OGAR, kay kalampusan usab kini sa mga Bol-anon.
