TAGBILARAN CITY, Bohol, October 28 (PIA)–Si Presidente Ferdinand “Bongbong” R. Marcos miingon nga ang gobyerno nagpabilin nga lig-on sa ilang pasalig sa pagtabang sa micro, small, and medium enterprises (MSMEs) nga molambo pinaagi sa pagpahapsay sa kasamtangan nga mga proseso ug paghimo nga mas sayon alang sa mga negosyo nga molambo samtang ang nasud nagpaayo gikan sa coronavirus disease 2019 (COVID-19) pandemic.
Si Marcos mihimo sa pasalig adlaw’ng Biyernes, Oktubre 28 atol sa ribbon cutting sa Small and Medium Enterprises (SME) Hub sa Savya Financial Center sa syudad sa Taguig, samtang iyang gitumbok ang papel sa MSME sector sa pagpadasig sa ekonomiya ngadto sa inclusive ug sustainable recovery.
Giawhag sa Presidente ang tanang MSMEs sa Pilipinas sa pagpahimulos sa kasamtangang pinansyal nga tabang ug pasilidad nga gitanyag sa gobyerno ug partner nga mga institusyon aron mapadako ang potensyal sa sektor nga mahimong makina sa Pilipinas alang sa inclusive economic growth recovery.
Gitumbok ni Marcos ang mga numero sa gobyerno gikan sa 2021 nga nagpakita nga ang MSMEs adunay labaw sa 99.5 porsyento sa tanan nga mga establisemento sa negosyo dinhi sa Pilipinas, nga nakamugna og kapin sa 5 milyon nga mga trabaho.
Gidasig usab niini ang MSMEs sa pagsagop sa information and communications technology (ICT) isip kabahin sa business strategy ug padulong sa digital transformation sa nasud.
Nanawagan ang Presidente sa tanan nga makig-uban sa gobyerno sa pagtabang sa pagbangon sa ekonomiya sa nasud pinaagi sa paghatag og gahum ug pagpalig-on sa mga MSMEs.
“May we all work harmoniously, through our respective endeavors, to keep the Philippines rich and fertile for businesses to grow and evolve — one where every citizen can confidently take the leap of faith, start a business, and dare to dream of a future of security, stability, and prosperity (Hinaut nga kitang tanan magtrabaho nga nagkahiusa, pinaagi sa atong tagsa-tagsa ka mga paningkamot, aron magpabilin nga adunahan ug tabunok ang Pilipinas alang sa mga negosyo nga molambo ug molambo — diin ang matag lungsuranon masaligon nga molukso sa pagtuo, magsugod sa negosyo, ug mangahas sa pagdamgo sa kaugmaon sa seguridad, kalig-on, ug kauswagan)”, matud pa ni Marcos. (ecb/PIA7-Bohol)
