USA ka polis kinsa nadakpan human giingong nanulis sa usa ka gasoline station didto sa Brgy. Poblacion, lungsod sa Trinidad, gituohang maoy suspek sa pagpanulis sa gasolinahan didto sa lungsod sa Alicia ug Duero.
Sigun ni Bohol Provincial Police Office director, P/Col. Lorenzo Batuan, nga si PSSg Conchito Payac Jr., nga nadestino sa Dauis Municipal Police Station isip usa ka desk officer, nadakpan human niini gitulis ang AVA Gasoline Station sa Purok-4, Brgy Poblacion lungsod sa Trinidad mga ala una sa hapon kagahapon.
Matud pa ni Batuan nga si Payac gipailawom sa surveillance sa Provincial Intelligence Unit (PIU) human nakakuha og ebidensya nga naglambigit niini sa nahitabong tulis sa Alicia ug Duero.
“Gimonitor siya sa PIU tungod kay didto sa insidente sa Duero, duna tay nakuha na CCTV footage na kaning suspect resembling [Payac], mao duna miy pagduda. Pareho ra ang description, ang pamarog ug ang gipang suot niya,” butyag ni Batuan.
Nakuha gikan sa posisyon ni Payac ang P8,000 nga salapi nga iyang nasikwat sa gas station ug iyang service firearm.
Sigun ni Batuan nga giingong nasikwat ni Payac ang P1,900 gikan sa gasolinahan sa Alicia niadtong Disyembre 1 ug P7,000 gikan sa gasolinahan sa Duero niadtong Disyembre 7.
Gikustodiya na ang maong polis sa Trinidad Municipal Police Station sa dili pa kini pasakaan og kaso sa korte.
Niingon si Batuan nga mag-atubang si Payac ug kasong administratiba ug kasong robbery.
Sa laing bahin, gitun-an usab sa kapolisan kun nalambigit ba usab ang maong polis sa sunod -sunod nga tulis sa kadalanan sa Bohol sayo ning tuiga.
Dugang ni Batuan nga si Payac giingong gidungog nga naadik sa ilegal gambling ug adunay chicken farm sa manok igtatari ug lagmit dili makaigo sa panginahanglanong pinansiyal hinungdan nga nahimo niini ang maong krimen. (ALAN ANDY NALZARO DALAGAN)
