DAVAO CITY – Ug magmalampuson ang bag-ong teknolohiya nga ipatuman sa Davao City Jail (DCJ), posible nga masulbad ang problema sa nagpadayon nga kalambigitan sa mga binilanggo sa mga krimen nga nagpanghitabo sa gawas.
Kahinumduman nga niadtong milabay nga administrasyon, naungkat ang tablag bohemyo nga kinabuhi sa mga priso sud sa National Bilibid Prison sa Muntinglupa. Tungod sa gahum sa teknolohiya ug social media, nakit-an ang dugay nang gitago nga sekreto sa mga sikat nga priso lakip na ang pagbaton og mga mahalon nga mga kubol ug ang pagpahimus sa binayran nga kalipay.
Apan di lang ang kinabuhing hari ug gawasnon sa mga lider sa mga dagkung gang ang problema. Ang mas daku nga suliran mao ang ilang padayon nga kalambigitan, kung di man pagpadagan, sa mga kriminal nga kalihukan. Gani, di palabaw ang sugilanon nga mas hapsay na hinoon ang pagpadagan sa mga sindikato tungod kay di na man maglikay-likay ug magtago-tago sa mga tinugyanan sa balaod ang mga nangulo niini.
Sa way pagduha-duha, daku ang papel sa komunikasyon niining maong operasyon. Ug yawe niini mao ang padayon nga paghupot sa mga cellphones sa mga gamhanang binilanggo. Di sekreto kon nganong nagpadayon kini. Tungod usab sa mga kurakot nga mga opisyales ug gwardiya, mahimong ipayuhot ang mga cellphones basta husto lang ang bayad. Matud pa, mogasto ang mopahimus niini ug P150,000 o labaw pa matag buwan.
Kada buwan dunay mga cellphones nga pasudlon basta human nag bayad. Kada buwan usab imbargohon kini. Sa ato pa, gahinan sa ulo sa sindikato ug labing menos P150,000 kada buwan aron padayon ang kontak sa gawas.
Apan tungod niining bag-ong teknolohiya, inihap na ang adlaw ning maong kabuang dinhi sa DCJ. Dunay himan nga ipahimutang aron pagngon ang signal sa tanang cellphones gawas sa sa warden ug pinili nga mga opisyales sa maong prisohan.
Sa ato pa, magpadayon ang komunikasyon ning maong mga opisyal sa gawas aron ipatuman ang ilang trabaho. Di pud angayan nga larason silag apil sa mga priso nga di mahimong mogamit og cellphone kay di man si binilanggo.
Dunay mag-una sa pagduda nga basig dunay mga badlongon nga mga tinugyanan nga mao ra usay mag-abuso niini. Di ta mosulti nga di ni mahitabo apan daku kaayong risgo alang kanila kay duna may talaan kon unsa nga mga numero ang nanawag ug gitawgan.
Niadtong mga manggidudahon, lisud tingali tuhoan nga dinhi na lang kutob kining maong modus. Duna silay punto. Apan di usab ikalalis nga kapila pil-a ang kalisud nga ilang sagubangon ug ang gastohon aron padayonon ang maong pamaagi. Salamat ning bag-ong teknolohiya, inihap na ang adlaw ning maong modus. Manghinaut ta nga masirado na gyud kining maong gripo nga gipahimuslan sa mga badlongon ug mga bungoton.
